Voropnun hófst á Skriðuklaustri á föstudaginn langa 29. mars. Þá voru opnaðar tvær sýningar. Annars vegar Fjölröddun, sýning Bjargar Eiríksdóttur, myndlistarkonu frá Akureyri, á videóverki og málverkum. Sú sýning er í stássstofu á efri hæð en niðri í gallerí Klaustri er sýning á fimm málverkum eftir Gunnar yngri listmálara, son skáldsins. Gunnarsstofnun hefur nýverið fest kaup á þeim verkum og því við hæfi að sýna þau. Þessar páskasýningarnar standa til 14. apríl og eru opnar alla daga kl. 11-17. Safnið og Klausturkaffi eru opin á sama tíma og í boði hádegishlaðborð alla daga og kaffihlaðborð að auki um helgar. 

Fyrsti viðburður ársins 2024 á Skriðuklaustri er að venju á konudeginum. Að þessu sinni kemur Lilja Árnadóttir, fyrrum sviðsstjóri munasafns Þjóðminjasafnsins, með erindið Með verkum handanna: Um listsköpun íslenskra kvenna á fyrri öldum.  Titill erindisins er hinn sami og yfirstandandi sýningar í Þjóðminjasafni Íslands þar sem sýnd eru öll 15 refilsaumsklæði íslensk sem varðveist hafa frá miðöldum. Sýningin byggir á áratugarannsókn Elsu E. Guðjónsson (1924-2010) á refilsaumi en hún starfaði á Þjóðminjasafni Íslands í rúm 30 ár. Lilja var ráðgjafi við sýninguna og ritstýrði einnig bók Elsu sem kom út í tengslum við sýninguna og hefur vakið mikla athygli.

Erindið hefst kl. 14, sunnud. 25. feb. Aðgangur er ókeypis og eru öll velkomin meðan húsrúm leyfir. Viðburðinum verður einnig streymt á Youtube-rás Skriðuklausturs.

Klausturkaffi býður upp á hádegisverð á undan erindinu og kaffihlaðborð að því loknum. Nánari upplýsingar um það eru á Facebooksíðu Klausturkaffis. 

Rithöfundalestin brunar um Austurland

Rithöfundalestin verður á ferð um Austurland 16. - 19. nóvember og stoppar á sex stöðum þetta árið. Kjarna lestarinnar mynda höfundarnir: Arndís Þórarinsdóttir með barnabókina Mömmuskipti; Bergþóra Snæbjörnsdóttir með skáldsöguna Duft - söfnuður fallega fólksins; Nanna Rögnvaldardóttir með skáldsöguna Valskan; og Eskfirðingarnir Sævar Guðjónsson og Þórhallur Þorvaldsson með bókina um Palla í Hlíð - stilkur úr lífshlaupi ævintýramanns. Jafnframt verða kynnt fleiri verk er tengjast Austurlandi og verður viðburðurinn á Skriðuklaustri í opnu streymi á netinu.

Upplestrarsamkomur Rithöfundalestarinnar verða sem hér segir:

Fimmtudaginn 16. nóv. á Vopnafirði í Uss Bistro Kaupvangi kl. 20:30; föstudaginn 17. nóv. í Löngubúð á Djúpavogi kl. 20:00; laugardaginn 18. nóv. í Safnahúsinu í Neskaupstað kl. 14:00 og í Skaftfelli Seyðisfirði kl. 20:00. Lestarferðinni lýkur á sunnudeginum 19. nóv. með viðburði á Skriðuklaustri kl. 13.30 (verður einnig í streymi) og á KHB ölstofu á Borgarfirði kl. 20:00.

Allar frekari upplýsingar er að finna á facebook síðum gestagjafa upplestaranna. 

Rithöfundalestin er að stofni til frá 1992 og nýtur stuðnings Uppbyggingarsjóðs Austurlands og austfirskra fyrirtækja sem og annarra aðila.