Hátíðin er að ganga í garð og góðu ári að ljúka. Gunnarsstofnun og Klausturkaffi óska öllum sem heimsóttu staðinn á árinu gleðilegra jóla og vonast til að sjá sem flesta aftur á nýju ári. Landsmenn allir eru minntir á að hlusta á lokalestur Aðventu á Rás 1 kl. 15. á morgun aðfangadag. Þá mun Svanhildur Óskarsdóttir ljúka lestri sínum á sögu Gunnars. En fyrir þá sem missa af þessu er hægt hlýða á upptöku af lestri Svanhildar í skrifstofu skáldsins á Skriðuklaustri 15. desember sl. hér á  YouTube.

Aðventa verður að venju lesin þriðja sunnudag í aðventu á Skriðuklaustri. Að þessu sinni les Svanhildur Óskarsdóttir, sérfræðingur á Árnastofnun, söguna um Bensa og félaga hans. Lesturinn hefst kl. 14 og eru allir velkomnir meðan húsrúm leyfir. Boðið verður upp á kaffi og smákökur en lesturinn tekur rúmar tvær klukkustundir. Á sama tíma verður sagan lesin í Gunnarshúsi í Reykjavík, hjá Rithöfundasambandinu að Dyngjuvegi 8. Þar munu hjónin Olga Guðrún Árnadóttir og Guðmundur Ólafsson hefja lestur kl. 13.30. Þess má geta að sagan er lesin í Moskvu af rússneska leikaranum Veniamin Smekhov laugard. 14. des. og í Berlín las Matthias Scherwenikas Aðventu í íslenska sendiráðinu 1. des.

Um næstu helgi koma góðir gestir í Skriðuklaustur. Laugard. 30. nóv. verða Jón Kalman, Vigdís Gríms, Andri Snær, Bjarki Bjarna og Sigríður Þorgríms á ferðinni og lesa upp úr bókum sínum kl. 14. Á sunnudaginn er síðan komið að árvissri Grýlugleði og hefst hún kl. 14 og jólakökuhlaðborð á eftir. Um þetta og fleira má lesa í Klausturpóstinum sem er kominn út.

Í tilefni af Dögum myrkurs er opið um næstu helgi 16. og 17. nóv. kl. 14-17 á Skriðuklaustri. Sýnd verða myndbandsverk eftir skoska listamenn sem fjalla um náttúru og sögu hinna dreifðu og afskekktu byggða á austurströnd Skotlands, m.a. um skoska úlfinn sem dó út fyrir 300 árum. Listamennirnir hafa allir tekið þátt í Feneyjartvíæringnum fyrir Skotlands hönd. Frances Davis frá Timespan menningarmiðstöðinni í Helmsdale mun segja frá verkunum og starfsemi Timespan kl. 14 á laugardaginn. Klausturkaffi býður upp á súkkulaðikökur með meiru báða dagana. Sjá nánar um verkin og listamennina.