11. desember 2001

Gunnarsstofnun ræður menningarfulltrúa

Gunnarsstofnun auglýsti um miðjan nóvember eftir menningarfulltrúa til að þjóna menningarstarfi í fjórðungnum samkvæmt þjónustusamningi við Menningarráð Austurlands, sem Helgi Gíslason, stjórnarformaður Gunnarsstofnunar, og Gísli Sverrir Árnason, formaður Menningarráðs, undirrituðu að Skriðuklaustri 2. nóvember sl.

19. nóvember 2001

Myrkra-verk og Grýlugleði

Það styttist síðan í hina vinsælu Grýlugleði sem sló öll aðsóknarmet í fyrra. Fjölskylduvæn dagskrá um Grýlu og hyski hennar sem löngum hefur eldað grátt silfur við Fljótsdælinga og fleiri Héraðsbúa verður flutt þrisvar sinnum að þessu sinni til að forðast troðning. Ekki er um sömu dagskrá að ræða og í fyrra. Sýningar verða laugardag 1. des. kl. 15 og sunnudag 2. des. kl. 14 og kl. 16. Að sjálfsögðu verður Klausturkaffi svo með jólakökuhlaðborð að dagskrá lokinni. Vissara er að panta miða á Grýlugleðina í tíma í síma 471-2990 eða senda tölvupóst á This email address is being protected from spambots. You need JavaScript enabled to view it. með upplýsingum um fjölda fullorðinna og barna ásamt símanúmeri.

Grýlugleðin nýtur að þessu sinni styrks úr Menningarborgarsjóði og á henni verða veitt verðlaun í teiknisamkeppni um Grýlumyndir sem efnt var til meðal nemenda í yngri bekkjum austfirskra grunnskóla, auk þess sem allar innsendar myndir verða til sýnis. Aðgangseyrir á Grýlugleðina er kr. 400 en ókeypis fyrir 12 ára og yngri.

6. nóvember 2001

Svörtu skólar á Skriðuklaustri
- trú og töfrar

2. nóvember 2001

Skrifað undir á Skriðuklaustri

Í dag voru undirritaðir tveir samningar að Skriðuklaustri. Annars vegar var undirritaður samningur milli menntamálaráðuneytis og Stofnunar Gunnars Gunnarssonar um fjárframlög næstu þrjú árin og gagnkvæmar skyldur, en samkvæmt honum fær Gunnarsstofnun 10,6 m.kr. á ári af fjárlögum til starfsemi sinnar. Samninginn undirrituðu Björn Bjarnason menntamálaráðherra og Skúli Björn Gunnarsson, forstöðumaður Gunnarsstofnunar.
Hins vegar var skrifað undir samning milli Gunnarsstofnunar og nýstofnaðs Menningarráðs Austurlands sem felur í sér að stofnunin tekur að sér að vinna ákveðin verkefni á vegum ráðsins og ráða sérstakan starfsmann til að þjónusta menningarstarfsemi á Austurlandi. Fyrir þennan þjónustusamning greiðir Menningarráðið 5,5 m.kr.

31. október 2001

Lomber og barokk um helgina

Lomber-spilamenn geta farið að dusta rykið af stokkunum. Föstudagskvöldið 2. nóvember verður fyrsta lomber-kvöld vetrarins að Skriðuklaustri. Hefst það kl. 20.00

Baráttu-barokk hópurinn mun halda barokk tónleika að Skriðuklaustri á sunnudag 4. nóvember kl. 17.00. Hópinn skipa, Suncana Slamnig, Charles Ross, Rosemary Hewlett, Jón Guðmundsson og Páll Ívan. Klausturkaffi verður með kaffihlaðborð á undan tónleikunum frá kl. 15.30.

31. október 2001

Samið við Gunnarsstofnun

Föstudaginn 2. nóvember verða undirritaðir tveir mikilvægir samningar að Skriðuklaustri. Annars vegar mun menntamálaráðherra undirrita þriggja ára samning milli menntamálaráðuneytis og Gunnarsstofnunar um fjárframlög og gagnkvæmar skyldur. Hins vegar samningur milli Menningarráðs Austurlands og Gunnarsstofnunar um þjónustu við menningarstarfsemi á Austurlandi sem kveður m.a. á um að Gunnarsstofnun ráði sérstakan starfsmann til að vinna ýmis verkefni í þágu menningarstarfs í fjórðungnum.

16. september 2001

Land möguleikanna?
- Hvernig verður landnýtingu háttað á Héraði til framtíðar?

Ketill Sigurjónsson lögfræðingur flytur erindi um virkjanamál, landbúnað, náttúruvernd og fleira mánudagskvöldið 24. september, kl. 20.30. Aðgangseyrir kr. 300.

7. september 2001

Síðasta helgi hreindýrasýninga

18. ágúst 2001

Gunnar Gunnarsson og Noregur

Hreindýr á Austurlandi

Sýning um líf, sögu, nytjar og veiðar á hreindýrum þar sem myndir, mál og munir úr nútíð sem fortíð segja sögu þessara einkennisdýra Austurlands. Þessi sýning er samstarfsverkefni Gunnarsstofnunar, Náttúrustofu Austurlands og Markaðsstofu Austurlands.

Sýningin er styrkt af Umhverfisráðuneyti, Hreindýraráði og Landsvirkjun. Hún stendur til 9. september og er opin alla daga frá kl. 11-17 fram til 26. ágúst en eftir það um helgar á sama tíma.

Samhliða þessari sýningu er Skarphéðinn G. Þórisson líffræðingur með ljósmyndasýningu í Gallerí Klaustri. Þar sýnir hann nokkrar af þeim myndum sem hann hefur tekið við rannsóknir sínar á hreindýrum síðustu tvo áratugi.

1. ágúst 2001

Fjöll og firnindi og þjóðlagakvöld

Föstudaginn 3. ágúst opnar Ólöf Birna Blöndal sýningu á 26 landslagsmyndum í Gallerí Klaustri að Skriðuklaustri. Sýningin ber yfirskriftina „Fjöll og firnindi“. Eins og nafnið gefur til kynna er myndefnið sótt til íslenskra fjalla og öræfa, einkum Möðrudals- og Mývatnsöræfa, þar sem einstök náttúrufegurð fjallahringsins, leikur ljóss og skugga ásamt litbrigðum öræfanna er viðfangsefnið.
Myndirnar eru unnar með olíupastel á pappír. Ólöf Birna hefur um árabil unnið landslagsmyndir í olíupastel, jafnframt að mála olíumyndir og teikna og mála portret.
Sýningin stendur til 16. ágúst og er opin frá 11-17. alla daga.

Föstudagskvöldið 10. ágúst mun Ceilidh band Seyðisfjarðar undir stjórn Muff Worden leika keltnesk og íslensk þjóðlög , dans- og dægurlög. Tónleikarnir hefjast kl. 20.00 og aðgangseyrir er kr. 1000. Klausturkaffi býður gestum að panta kvöldverð á undan tónleikunum.

24. júlí 2001

Dauði Baldurs og draugar í fornum sögum
- fyrirlestur Vésteins Ólasonar

Laugardagskvöldið 28. júlí heldur Vésteinn Ólason prófessor fyrirlestur að Skriðuklaustri sem hann kallar Dauði Baldurs og draugar í fornum sögum. Í fyrirlestrinum mun hann fjalla um afstöðu til dauðans og dauðra í íslenskum fornbókmenntum. Jafnframt verða lesnir kafla úr þeim textum sem til umfjöllunar eru.
Fyrirlesturinn hefst kl. 20.00 og aðgangseyrir er kr. 500.

Gallerí Klaustur:
Mannamyndir Péturs Behrens

Pétur Behrens myndlistarmaður opnaði í dag sýningu á mannamyndum í Gallerí
Klaustri að Skriðuklaustri þriðjudaginn 17. júlí. Á sýningunni eru tíu portrettmyndir unnar með kolum og vatnslitum. Sýningin er opin á sama tíma og hús skáldsins, kl 11-17 alla daga, og stendur til 2. ágúst.

Pétur Behrens er fæddur í Hamborg árið 1937 og nam myndlist í Hamborg og Berlín. Hann flutti til Íslands 1962 og var stundakennari við Myndlista- og handíðaskóla Íslands og Myndlistaskóla Reykjavíkur 1978-1986. Hann hefur frá 1986 búið á Höskuldsstöðum í Breiðdal og stundað myndlist, þýðingar, hrossaræktun og tamningar. Pétur hefur haldið 13 einkasýningar og tekið þátt í fjölda samsýninga hér á landi og erlendis.

4. júlí 2001

Skáldsagnakvöldvaka

Laugardagskvöldið 14. júlí nk. verður skáldsagnakvöldvaka að Skriðuklaustri. Þar mun verða lesið úr nokkrum íslenskum skáldsögum og fluttir fyrirlestrar um þær. Þessi kvöldvaka er samvinnuverkefni Gunnarsstofnunar og Hugvísindastofnunar HÍ og voru fyrirlestrarnir sem fluttir verða áður fluttir á Skáldsagnaþingi í Reykjavík sl. vor.

Á dagskrá verða:
Svartfugl eftir Gunnar Gunnarsson - fyrirlesari Jón Yngvi Jóhannsson.
Leigjandinn eftir Svövu Jakobsdóttur - fyrirlesari Garðar Baldvinsson
Djúpið eftir Steinar Sigurjónsson - fyrirlesari Matthías Viðar Sæmundsson.
Sú kvalda ást sem hugarfylgsnin geyma eftir Guðberg Bergsson - fyrirlesari Birna Bjarnadóttir.

Dagskráin mun hefjast kl. 20.00 og rétt er að geta þess að Klausturkaffi mun hafa opið og bjóða léttan kvöldverð á undan fyrir þá sem vilja.

Menningarborgarsjóður, Íslandsbanki og menntamálaráðuneytið styrkja skáldsagnaþingin sem í sumar eru haldin á nokkrum stöðum utan höfuðborgarsvæðisins.

3. júlí 2001

Arni Haraldsson í Gallerí Klaustri
- rauðir púðar í túnfætinum

Kanadíski ljósmyndarinn Arni Haraldsson sýnir ljósmyndir frá sex löndum í Gallerí Klaustri dagana 3.- 15. júlí. Sýningin verður formlega opnuð föstudagskvöldið 6. júlí kl. 20-22 og eru allir velkomnir á opnunina.

Arni Haraldsson hefur undanfarin ár einbeitt sér að því að fanga evrópskan módernisma í útjöðrum hins vestræna heims. Myndir hans sýna borgarlandslag og arkitektúr frá miðri 20. öld og varpa m.a. ljósi á hvernig nútímabyggingar endurspegla mannlífið sem í þeim hrærist.

Arni er fæddur á Íslandi en flutti ungur til Kanada. Hann býr og starfar í Vancouver og kennir ljósmyndun við Emily Carr College of Art and Design.

Rauðir púðar eftir Marnie Moldenhauer
Í túnfætinum við Skriðuklaustur er umhverfislistaverkið Rauðir púðar, sem þýska listakonan Marnie Moldenhauer vann í júnímánuði. Ætlunin er að hafa listaverkið uppi út júlímánuð og eru áhugasamir því hvattir til að leggja leið sína í Skriðuklaustur og berja það augum hið fyrsta.

Opið er að Skriðuklaustri frá 11-17 alla daga og er Klausturkaffi opið á sama tíma.

17. júní 2001

Sýningar og sumaropnun

Föstudagskvöldið 15. júní opnaði Sigurður Blöndal, fyrrum skógræktarstjóri, sýninguna Austfirsku meistararnir í aðalstofum Skriðuklausturs. Á sýningunni eru verk úr eigu Listasafns Íslands eftir myndlistarmenn sem annaðhvort eru fæddir eða aldir upp á Austurlandi. Þeir sem eiga verk á sýningunni eru: Jóhannes. S. Kjarval, Finnur Jónsson, Svavar Guðnason, Jón Þorleifsson, Nína Tryggvadóttir, Gunnlaugur Scheving, Höskuldur Björnsson, Dunganon, Tryggvi Ólafsson, Elías B. Halldórsson og Ingiberg Magnússon.

Á sama tíma var opnuð sýning í Gallerí Klaustri á ljósmyndaverkum eftir Ólöfu Björk Bragadóttur, útskrifaða myndlistarkonu frá Montpellier í Suður-Frakklandi og núverandi myndlistarkennara við Menntaskólann á Egilsstöðum. Þá er enn opin sýningin SKRIÐA eftir þær stöllur, Elísabetu Stefánsdóttur og Margréti Ómarsdóttur, myndlistarnema úr LHÍ.

Frá og með þessari helgi er opið alla daga kl. 11-17 að Skriðuklaustri fram til 26. ágúst. Þar getur að líta ofangreindar sýningar ásamt grunnsýningu um Gunnar Gunnarsson skáld, Fjallkirkjuteikningar Gunnars yngri listmálara og jafnframt fá gestir persónulega leiðsögn um hús skáldsins. Að því loknu geta gestir síðan sest niður og notið kaffihlaðborðs í veitingastofunni Klausturkaffi sem er á neðri hæð hússins.

23. maí 2001

SKRIÐA á Skriðuklaustri

Laugardagurinn 26. maí er opnunardagur myndlistarsýningar í Gallerí Klaustri að Skriðuklaustri. Elísabet Stefánsdóttir og Margrét Ómarsdóttir, nemar á öðru ári í grafík við Listaháskóla Íslands, sýna verk unnin með blandaðri tækni. Sýningin nefnist SKRIÐA og er liður í Hringferð myndlistarnema LHÍ.
Þetta er jafnframt fyrsti dagur sumaropnunar að Skriðuklaustri. Fram í miðjan júní verður opið um helgar frá 11-17 en eftir það alla daga vikunnar. Myndlistarsýningin SKRIÐA verður í Gallerí Klaustri til 10. júní og er opin á sama tíma og húsið. Þessa fyrstu helgi sumarsins er aðgangur ókeypis að Skriðuklaustri.

3. maí 2001

Sunnudaginn 13. maí kl 15.00 munu Ingveldur G. Ólafsdóttir söngkona og Atli Heimir Sveinsson tónskáld halda tónleika að Skriðuklaustri. Á efnisskrá verða lög Atla Heimis við kvæði Jónasar Hallgrímssonar. Aðgangseyrir er kr. 1.500 og miðapantanir í síma 471-2990. Klausturkaffi verður opið eftir tónleikana.

29. mars 2001

Lomber og kvöldvaka

Næstkomandi miðvikudagskvöld 4. apríl kl. 20 munu þeir sem hafa áhuga á að hittast og spila lomber geta komið saman að Skriðuklaustri. Þátttökugjald er ekkert og spil og spilapeningar á staðnum. Hægt verður að kaupa kaffi. Vonir standa til að áhugamenn um lomber fjölmenni líkt og á lomberdaginn sem haldinn var 3. mars.

Kvöldvaka með blandaðri dagskrá verður laugardagskvöldið 7. apríl og hefst kl. 20.30. Á dagskrá verður litskyggnusýning Sigurðar Blöndal frá Leifsbúðum á Nýfundnalandi (L'Anse aux Meadows), Muff Wurden mun flytja þjóðatónlist, Hrefna Róbertsdóttir sagnfræðingur mun skyggnast aftur í aldir. Þá mun Skúli Björn Gunnarsson forstöðumaður lesa kvæði nokkurra skálda. Aðgangseyrir er kr. 500. Klausturkaffi verður opið í tengslum við kvöldvökuna.

15. mars 2001

Hverjir áttu Ísland við lok 17. aldar?

Sunnudaginn 18. mars nk. mun dr. Gísli Gunnarsson hagsögufræðingur flytja fyrirlestur að Skriðuklaustri um jarðeignir og efnahag við lok 17. aldar. Sérstök áhersla verður lögð á efnahagsástand á Austurlandi með tilliti tileignarhalds á jörðum í fjórðungnum.

Gísli Gunnarsson er sagnfræðiprófessor við Háskóla Íslands. Hann hefur um árabil stundað rannsóknir á íslensku efnahagsástandi og samfélagsgerð, einkum fyrr á tímum. Bók hans, Upp er boðið Ísaland: einokunarverslun og íslenskt samfélag 1602-1787, sem kom út 1987, er þýdd og endurskoðuð útgáfa doktorsritgerðar hans frá árinu 1983. Gísli er nú í rannsóknarleyfi og hefur að undanförnu dvalist í gestaíbúðinni að Skriðuklaustri við fræðastörf.

Fyrirlesturinn hefst kl. 15. Aðgangur er ókeypis. Klausturkaffi verður opið að loknum fyrirlestri.

20. febrúar 2001

Myndlist, lomber og norðurljós

Síðasta sýningarhelgi myndlistarsýningarinnar í febrúar er framundan. Á sunnudaginn verður einnig fyrirlestur um norðurljósin fluttur af Oliver Kochta, þýskum myndlistarmanni. Og síðan er það náttúrlega lomberinn þann 3. mars.

22. janúar 2001

Myndlistarsýning og Lomber-dagur

Þá er runnin upp ný öld og tími til kominn að halda áfram með viðburði að Skriðuklaustri. Skammdegið er samt við sig þó að sól sé tekin að hækka á lofti. Í febrúar verður skemmtileg og fersk myndlistarsýning og hinn 3. mars er loksins komið að því sem margir hafa beðið eftir, LOMBER-DAGUR.

6. desember 2000

Stórkostlegur Sonnettusöngur
- metaðsókn á Grýlugleði

Óhætt er að segja að skammdegisviðburðir að Skriðuklaustri hafi tekist vel. Sem áður greinir var góð aðsókn á kvöldvöku á Degi myrkursins. Sömu sögu er að segja um Sonnettusönginn sunnudaginn 26. nóvember.

Grýlugleði var haldinn sunnudaginn 3. desember og varð húsfyllir, svo vægt sé til orða tekið. Á hana mættu 120-130 manns af Héraði og neðan af Fjörðum. Fjöldi barna var mikill og skemmtu þau sér konunglega eins og hinir fullorðnu. Sagnaálfurinn Dvalinn stýrði gleðinni og sagði frá kynnum sínum og álfanna af Grýlu. Skógartríóið söng og lék Grýlukvæði. Krakkar úr Hallormsstaðaskóla lásu veislukvæði um Grýlu og sviðsettu það. Því miður komu þau Grýla og Leppalúði þegar gleðin stóð sem hæst og höfðu Dvalin sagnaálf á brott með sér. Upp úr því lauk skemmtuninni en við tók kaffihlaðborð hjá Klausturkaffi.

Miðað við frábæra aðsókn og góða stemmningu er ráðgert að gera Grýlugleði að árvissum viðburði að Skriðuklaustri.

21. nóvember 2000

Góð aðsókn á kvöldvöku - Sonnettusöngur á sunnudag

Góð aðsókn var á kvöldvökuna á Degi myrkursins. Um 30 gestir hlýddu á dagskrá sem stóð í hátt í tvær klukkustundir með kaffipásum. Dagskráin fór fram við arineld í stásstofu Gunnarshúss og nutu menn þar góðra veitinga og skemmtilegrar dagskrár.

Næsti viðburður er frumflutningur á lögum Keiths Reed við nokkrar af sonnettum Gunnars Gunnarssonar úr Sonnettu sveigi sem skáldið orti til konu sinnar Franziscu. Þeir tónleikar verða sunnudaginn 26. nóvember kl. 15.00 og er nauðsynlegt að panta sér miða til að tryggja sér sæti þar sem sætaframboð er takmarkað.

17. nóvember 2000

Kvöldvaka myrkursins

KVÖLDVAKA helguð Degi íslenskrar tungu og Degi myrkursins. Fjölbreytt dagskrá með upplestri, leiklestri, erindum og tónlist. Skemmtilegt fyrir alla nema e.t.v. þau allra yngstu. Kaffiveitingar á boðstólum. 

23. október 2000

Nytjalist úr náttúrunni - Frábær aðsókn

Nytjalistarsýning Handverks og hönnunar, sem stóð frá 13. til 22. október, hlaut frábærar viðtökur að Skriðuklaustri. Um 500 manns lögðu leið sína í Fljótsdalinn til að sjá sýninguna. Flestir nýttu sér einnig kaffihlaðborðið hjá Klausturkaffi og áttu góðan dag að Skriðuklaustri. Ánægjulegt var að skólahópar úr grunnskólum og framhaldsskólum komu einnig og fræddust í leiðinni um Gunnar skáld og Skriðuklaustur.

10. október 2000

Nytjalist úr náttúrunni 13. - 22. október

Nytjalist úr náttúrunni er heiti sýningar sem er framlag HANDVERKS OG HÖNNUNAR til dagskrár Reykjavíkur menningarborgar Evrópu árið 2000. Sýningin var fyrst sett upp í Ráðhúsi Reykjavíkur í lok ágúst en nú er hún komin á ferð um landið. Fyrst verður hún sett upp hjá Gunnarsstofnun að Skriðuklaustri.

4. október 2000

Velheppnaður menningarminjadagur

27. september 2000

Vetrardagskrá í mótun

Vetrardagskrá Gunnarsstofnunar að Skriðuklaustri er í mótun. Þó er ljóst að 30. september nk. verður dagskrá í tengslum við Menningarminjadag Evrópu þar sem farið verður yfir gerðar og fyrirhugaðar fornleifarannsóknir á Skriðuklaustri. (Sjá nánar). Jafnframt er búið að ákveða að 14.-22. október verði að Skriðuklaustri opin sýning á vegum Handverks og hönnunar á nytjalist sem unnin var út frá þemanu VATN. Þá mun Dagur íslenskrar tungu verða haldinn hátíðlegur með dagskrá 16. nóvember og verið er að leggja drög að kvöldvökum og lomber-námskeiði.

20. september 2000

Sumaropnun lokið

Sumartíma á Skriðuklaustri er nú lokið. Húsið er ekki lengur opið alla daga frá 11-17. Engu að síður geta hópar haft samband við forstöðumann í síma 471-2990 og fengið leiðsögn um húsið. Sömu sögu er að segja um veitingastofuna Klausturkaffi. Hún er býður þjónustu við hópa, hvort sem er kaffiveitingar eða mat. Hægt er að ná í veitingaraðilann í heimasíma 471-2909 eða 471-2992.

Þá er rétt að minna á að virðuleg fundarstofa er að Skriðuklaustri sem hentar vel fyrir smærri fundi, allt að 10 manns. Gunnarsstofnun leigir út þessa aðstöðu og síðan geta menn keypt sér veitingar hjá Klausturkaffi. Áhugasamir hafi samband við forstöðumann stofnunarinnar.

20. júní 2000

Fyrsti almenni opnunardagur

Skriðuklaustur opnaði í morgun kl. 11.00 fyrir gestum. Í sumar verður opið frá 11.00 til 17.00 alla daga nema mánudaga allt fram í september. Í húsinu eru nú þegar komnar upp tvær sýningar, annars vegar á málverkum og teikningum eftir Gunnar Gunnarsson yngri listmálara og hins vegar grunnsýning á veggspjöldum um Gunnar Gunnarsson eldri skáld. Þá eru komin upprunaleg húsgögn úr eigu Gunnars og Franziscu konu hans sem voru á Skriðuklaustri á sínum tíma.

Veitingastofa sem býður léttan hádegisverð og kaffiveitingar, auk sérþjónustu ef eftir er óskað, er starfrækt í húsinu og opin á sama tíma, þ.e. 11-17. Sími veitingastofu er 471-2992.

18. júní 2000

Opnunarhátíð að Skriðuklaustri

Í dag hóf Björn Bjarnason formlega starfsemi Gunnarsstofnunar að Skriðuklaustri með því að klippa á borða sem opnaði leið inn í hús skáldsins. Þar með er skipulögð starfsemi stofnunarinnar á Skriðuklaustri hafin með sýningum á listaverkum eftir Gunnar Gunnarsson yngri listmálara og grunnsýningu um Gunnar skáld. Einnig hefur tekið til starfa í húsinu veitingastofa þar sem hægt er að fá léttan hádegisverð og kaffiveitingar.

Við opnunina sagði menntamálaráðherra að Gunnarsstofnun væri þungamiðja í menningarstarfsemi á Austurlandi um þessar mundir. Hann lýsti yfir ánægju sinni með hversu hratt og örugglega hefði gengið að koma starfsemi af stað á Skriðuklaustri enda væri kominn tími til eftir áratugalangar þrautir margra forvera sinna og annarra ráðamanna.

Á annað hundrað manns mættu til opnunarhátíðarinnar og ríkti almenn ánægja með þær endurbætur sem gerðar hafa verið á Gunnarshúsi og einnig með þær sýningar sem settar hafa verið upp.

15. júní 2000

Landsvirkjun bakhjarl Skriðuklausturs númer eitt

Samkomulag það sem stjórnendur Stofnunar Gunnars Gunnarssonar og Landsvirkjunar skrifa undir hér í dag, 15. júní, felur í sér að Landsvirkjun leggur til á næstu fimm árum 15 milljónir króna í skipulag og framkvæmdir á lóð þeirri sem Gunnarsstofnun hefur til umráða að Skriðuklaustri. Í staðinn fær Landsvirkjun afdrep undir sýningu á raforkumálum í einu herbergi Gunnarshúss og einnig utandyra.

Markmiðið með samkomulaginu er að rækta skipulega upp 15 ha svæði sem myndar veglega umgjörð um hús Gunnars Gunnarssonar og hefur útivistar- og fræðslugildi fyrir allan almenning. Við hönnun svæðisins verður tekið tillit til allra sögu- og náttúruminja sem á því finnast og reynt að nýta landslagið eins og það er til að skapa fallegt útivistarsvæði.

Með undirritun þessa samkomulags verður Landsvirkjun Bakhjarl Skriðuklausturs númer eitt. Það er von stjórnenda Gunnarsstofnunar að fleiri aðilar fylgi í kjölfarið og styðji uppbyggingu menningar-, sögu- og fræðaseturs í Fljótsdal af jafnmiklum myndugleik og Landsvirkjun sýnir með framlagi sínu.

Landsvirkjun leggur strax fram 4 m.kr. til verkefnisins og mun skipulagning svæðisins á Skriðuklaustri hefjast hið fyrsta. Ætlunin er að hefja lóðarframkvæmdir einnig á þessu ári. Stefnt er að því að ljúka framkvæmdum á þessum 15 ha að mestu leyti fyrir árið 2005.

29. mars 2000

15 milljónir úr Endurbótasjóði menningarbygginga
– Stefnt að opnun um miðjan júní

10. janúar 2000

1. janúar 2000

5. okt. 1999