Sunnudaginn 19. febrúar verður opið á Skriðuklaustri kl. 14-17. Skúli Björn mun segja frá snjallleiðsögn um Héraðið, verkefni sem Hrafnkelufélagið hefur haft forystu um í samstarfi við Locatify. Erindi hans hefst kl. 14. Klausturkaffi býður upp á konudagskaffi með bolludagsívafi.
Gunnarsstofnun óskar öllum gleðilegs árs. Fyrsta lomberkvöld ársins 2012 verður haldið á Skriðuklaustri föstudaginn 13. janúar. Spilamennska hefst að venju kl. 20.00 og eru allir velkomnir, jafnt byrjendur sem snillingar.
6. desember 2010
Þorleifur Hauksson las Aðventu 2009.
Sunnudagur 12. desember:
Aðventuganga Benedikts á Klaustri, í Reykjavík og Kaupmannahöfn
Skáldsagan Aðventa eftir Gunnar Gunnarsson er klassískt verk sem margir taka sér í hönd í desember, ekki bara hér á landi heldur einnig erlendis. Sá siður var tekinn upp hjá Gunnarsstofnun á Skriðuklaustri árið 2005 að lesa alla Aðventu Gunnars Gunnarssonar upphátt fyrir gesti á þriðja sunnudegi í aðventu. Óhætt er að segja að þessi siður hafi breiðst út því að Ríkisútvarpið hefur nú í nokkur ár haft Aðventu sem útvarpssöguna á Rás 1 síðustu vikuna fyrir jól með nýjum lesara hverju sinni. Þá hefur Aðventa einnig verið lesin hjá Rithöfundasambandi Íslands í Gunnarshúsi í Reykjavík á sama tíma og á Skriðuklaustri.
Að venju verður Aðventa lesinn á Skriðuklaustri nk. sunnudag, 12 des. Lesturinn hefst kl. 14 og að þessu sinni les Ragnheiður Steindórsdóttir leikkona söguna. Allir eru velkomnir til að njóta kyrrðarstundar frá jólaamstrinu og gestir geta fengið sér jólakökur og heitt súkkulaði hjá Klausturkaffi. Á sama tíma stendur Rithöfundasambandið fyrir upplestri á Dyngjuvegi 8 í Reykjavík og hefur Silja Aðalsteinsdóttir, ritstjóri og fræðikona, lesturinn kl. 13.30. Þeir sem eru staddir í Kaupmannahöfn geta notið lesturs Aðventu í Jónshúsi því að öðru sinni stendur Sendiráð Íslands í samvinnu við Jónshús og Bókasafn Jónshúss nú fyrir lestri á sögunni. Í Jónshúsi hefst lesturinn kl. 15 að staðartíma og meðal lesara verður Sturla Sigurjónsson sendiherra.
Boðskapur Aðventu um þrautseigju og þolgæði Benedikts og förunauta hans, hundsins Leós og sauðsins Eitils, á heilmikið erindi við Íslendinga í dag. Sagan er í raun tímalaus þó að söguefnið sé sótt í raunverulegar svaðilfarir á Mývatnsöræfum á þriðja áratug síðustu aldar. Og allt frá því hún kom fyrst út árið 1936 hefur hún heillað lesendur víða um heim og m.a. verið endurútgefin reglulega í Þýskalandi þar sem hún hefur selst í um hálfri milljón eintaka á síðustu 70 árum.
5. desember 2010
Aðventudagskráin framundan:
Frábærar teikningar af Grýlu og hyski hennar
Gunnarsstofnun efndi til samkeppni meðal austfirskra grunnskólabarna í 6. og 7. bekk um teikningar af Grýlu og hyski hennar fyrir litabók sem ætlunin er að gefa út á næsta ári. Um 100 teikningar bárust, hver annarri glæsilegri og hanga þær nú uppi í gallerí Klaustri.
Þær tíu teikningar sem valdar hafa verið til að prýða litabók um Grýlu eru eftir eftirtalda listamenn:
Katla Heimisdóttir 6. bekk Nesskóla
Haukur Ingólfsson 6. bekk Nesskóla
Írena Fönn Clemmensen 7. bekk Nesskóla
Jóna María Aradóttir 6. bekk Nesskóla
Stefán Ingi Ingvarsson, 6. bekk Nesskóla
María Rún Karlsdóttir, 7. bekk Nesskóla
Magnea Ásta Magnúsdóttir 7. bekk Nesskóla
Andrea Björk Guðbjartsdóttir 7. bekk Nesskóla
Guðný Edda Guðmundsdóttir 7. bekk Brúarásskóla
Stefán Berg Ragnarsson 7. bekk Brúarásskóla
17. nóvember 2010
Aðventudagskráin framundan:
Rithöfundar, Grýla, jólahlaðborð og Aðventulestur
Vegna anna í jólahlaðborðum á Klaustri verða næstu tvö lomberkvöld í þéttbýlinu. Spilað verður föstud. 19. nóv. kl. 20 í Bókakaffi í Fellabæ og föstud. 10. des. kl. 20 í Hlymsdölum.
Ferð í fótspor Fjalla-Bensa hefur verið tekin í fóstur af Mývetningum og verður leiksýning Möguleikhússins ásamt litlu málþingi og ferð á söguslóðir 26. og 27. nóv. þar nyðra. Nánar hægt a forvitnast um það m.a. hjá jólasveinunum í Mývatnssveit.
Rithöfundalestin árvissa brunar í hlað á Klaustri laugard. 27. nóv. kl. 15. Þá lesa Bragi Ólafsson, Kristín Steinsdóttir, Sigrún Pálsdóttir og Ævar Örn Jósepsson úr verkum sínum. Sömu höfundar lesa á Vopnafirði á föstudagskvöld og í Skaftfelli á Seyðisfirði á sunnudaginn. Það kostar 1.000 kr. inn á upplesturinn, 500 kr. fyrir eldri borgara og innifalinn er kaffisopi. Bækur höfunda verða seldar á staðnum.
Grýla gamla lætur á sér kræla sunnud. 28. nóv. kl. 14. Þá munu gaulálfar og sagnálfar segja frá og syngja um Grýlu og hyski hennar. Einnig verða kynnt úrslit í keppni meðal 6. og 7. bekkingar á Austurlandi um grýluteikningar fyrir litabók. Að sjálfsögðu verður jólakökuhlaðborð hjá Klausturkaffi að lokinni Grýlugleðinni.
Að venju lýkur dagskrá ársins á Klaustri með upplestri á Aðventu Gunnars Gunnarssonar í skrifstofu skáldsins þriðja sunnudag í aðventu, 12. des. kl. 14. Að þessu sinni les Ragnheiður Steindórsdóttir. Á sama tíma verður opið í jólakökuhlaðborð hjá Klausturkaffi. Sama dag verður Aðventa bæði lesin í Kaupmannahöfn og í Gunnarshúsi á Dyngjuvegi 8 í Reykjavík.
Jólahlaðborðin hjá Klausturkaffi hefjast 26. nóv. og þeim lýkur 11. des. Enn er eitthvað laust af borðum og áhugasömum bent á að snúa sér til Elísabetar í síma 471-2992 eða This email address is being protected from spambots. You need JavaScript enabled to view it..
4. nóvember 2010
Margt á döfinni á Dögum myrkurs:
Dönsk list, djöflatertur og námskeið um Grýlu
Eitt og annað verður á döfinni á Klaustri á Dögum myrkurs. Lomberkvöld föstudaginn 5. nóvember kl. 20. Sunnudaginn 7. nóvember verður síðan opið kl. 14-17 og þá býður Klausturkaffi upp á sitt árvissa súkkulaðikökuhlaðborð. Danska listakonan Honey Biba Beckerlee sýnir videóverkið Truth Games, The Role and Performances sem hún vann með Kötju Boom Philip og fékk 3. verðlaun Brygger J.C. Jacobsens Portrætpris.
Laugardaginn 13. nóv. verður námskeiðið Ég þekki Grýlu í samvinnu við Þekkingarnet Austurlands. Á því verður fjallað um tröllkonuna Grýlu og austfirska grýlukvæðahefð. Námskeiðið stendur frá kl. 10-16 og verður endað á að kíkja á söguslóðir í Fljótsdal. Skráning er á www.tna.is.
20. september 2010
Lokahelgi sumarsins er framunda:
Síðasta sýningarhelgi allra sýninga og frumflutningur á dans-og tónverki
Framundan er lokahelgi sumarsins og opið verður laugardag og sunnudag kl. 12-17. Síðustu hlaðborðin hjá Klausturkaffi í bili og síðasta tækifæri til að sjá Fjallasýn, sumarsýninguna í stássstofu, sem og Kvik myndasýningu í gallerí Klaustri. Laugardaginn 25. sept. verða síðan dansarinn Megan Harrold og tónskáldið og gítaristinn Charlie Rauh með frumflutning á dans- og tónverki sem þau hafa unnið að undanfarnar vikur í gallerí Klaustri.
Verkið er fyrir dansara og gítar og byggir á sýnum nunnunnar Hildegard von Bingen (1098-1179). Hildigerður þessi var uppi á 12. öld og skrifaði um undarlegar sýnir sem segir frá í ritverkinu Scivias. Verk þeirra Charlie og Megan er samið út frá hinum skrifaða texta og orð og lýsingar yfirfærðar í dans og tóna. Einnig er það undir áhrifum frá tungumáli sem Hildigerður bjó sjálf til með eigin stafrófi.
Dans-og tónverkið er með stíganda og líkist lyftuferð þar sem samspil tónlistarmanns og dansara færir verkið frá einni hæð á aðra. Flutningur þess er því á vissan hátt spuni sem þó fylgir ákveðnum kjarna sem byggir á samhljómi listamannanna.
Verkið verður sýnt í Snæfellsstofu Vatnajökulsþjóðgarðs kl. 15.00 á laugardaginn og er aðgangur ókeypis. Sjá nánar um listamennina á culturalreflex.webs.com
24. ágúst 2010
Síðasta sýning sumarsins í gallerí Klaustri:
KVIK myndasýning opnuð föstudaginn 27. ágúst
Sýningu Önnu Sigríðar Sigurjónsdóttur, FLEY, lýkur í gallerí Klaustri nk. fimmtudag. Á föstudaginn verður síðan opnuð ný sýning í galleríinu sem er sú síðasta í sumar. Sú ber heitið Kvik myndasýning og að henni stendur hópur listamanna með austfirska tengingu. Þeir eru: Stuart Richardson, GLAMOUR (Karna&Sebastian), Þórunn Gréta og Jane Ade. Sýningin er í myndum og hljóði. Opnun fer fram kl. 17 föstudaginn 27. ágúst og eru allir velkomnir á opnun. Sýningin stendur út september og er opin á opnunartíma Gunnarshúss sem er kl. 10-18 alla daga fram til mánaðarmóta en 1. sept. styttist opnunartíminn í kl. 12-17. Áfram verður opið alla daga til 19. sept. og síðan helgina eftir það, 25.-26. sept.
Rétt er að þakka hér þeim fjölmörgu sem mættu á Fljótsdalsdaginn og skemmtu sér á Skriðuklaustri. Rúmlega 500 manns nutu tónleika Hvanndalsbræðra í boði Fljótsdalshrepps sem reyndar varð vegna veðurs að flytja inn í Snæfellsstofu. Flestir tóku síðan þátt í Þristarleikum og fleiru skemmtilegu.
20. ágúst 2010
Fljótsdalsdagur Ormsteitis á sunnudaginn:
Gönguferð, veiðikeppni, fjárdráttur, myndasamkeppni, sultukeppni að ógleymdum tónleikum Hvanndalsbræðra
10:00 Gönguferð um Ranaskóg í samvinnu við Ferðafélag Fljótsdalshéraðs.
Veiðikeppni í Bessastaðaá, mæting við Melarétt
12:00 Opið hús í Upplýsingamiðstöð Landsvirkjunar í Végarði og hjá Fljótsdalsgrund.
Léttar veitingar og verðlaunaafhending í veiðikeppni.
Kosning hefst í Snæfellsstofu í myndasamkeppni Ormsteitis.
Hádegishlaðborð hjá Klausturkaffi
13:30 Dagskrá á Skriðuklaustri
Tónleikar með Hvanndalsbræðrum
Þristarleikar:
Keppni í fjárdrætti, steinatökum, rabarbaraspjótkasti og pokahlaupi.
Sultukeppni:
Fólk mætir með heimagerðar sultur eða hlaup og dómnefnd velur þá bestu.
Rababarakeppni barnanna:
Börnin mæta með rabarbaraleggi, dæmt eftir lengd frá rót að blaði.
Úrslit kynnt í myndasamkeppni.
Kaffihlaðborð hjá Klausturkaffi.
16:30 Guðsþjónusta við rústir Skriðuklausturs
Ormsteiti slitið.
20. júlí 2010
Erindi um tónlist sunnudaginn 25. júlí:
Enrico Correggia segir frá tónsmíðum sínum
Sunnudaginn 25. júlí kl. 17 mun ítalska tónskáldið og stjórnandinn Enrico Correggia segja frá tónsmíðum sínum og tónlistarverkefnum. Correggia dvelur um þessar mundir í gestaíbúðinni Klaustrinu og vinnur að tónverki um Ísland sem flutt verður á tónlistarhátíð í Toríno í haust. Aðgangur ókeypis og allir velkomnir.
4. júlí 2010
Sé ég vítt um í gallerí Klaustri:
Sýningar og fyrirlestrar á næstunni
Föstudaginn 2. júlí opnaði Jónína Guðnadóttir sýningu á verkum úr leir og tré í gallerí Klaustri. Á sýningunni eru skepnur eða verur tengdar lofti, láði og legi. Sýningin er unnin sérstaklega fyrir rýmið enda Jónína þekkt fyrir að fást meira við stærri verk. Eftir hana er m.a. verkið Hringiða við aðalstíflu Kárahnjúkavirkjunar. Sýning Jónínu stendur til 28. júlí.
Fornleifafræðingarnir eru mættir á svæðið og byrjaðir að grafa í klausturrústunum á Skriðuklaustri. Skriðuklaustursrannsóknir hafa tekið upp samstarf við háskóla í Svíþjóð og í tengslum við það verða tvö erindi flutt á næstunni á Skriðuklaustri. Þriðjudagskvöldið 6. júlí, kl. 21.00 flytur sænskur doktorsnemi í fornleifafræði erindi um læknisfræði og fornleifarannsóknir. Mánudagskvöldið 12. júlí kl. 20.00 flytur dr.Cornelius Holtorf, prófessor í fornleifafræði við Linneus-háskólann í Kalmar, erindi um áhrif fornleifarannsókna á nærsamfélag sitt. Báðir fyrirlestrarnir fara fram á ensku. Aðgangur er ókeypis og allir velkomnir meðan húsrúm leyfir.
12. maí 2010
Sumarsýningin Fjallasýn:
Ráðherra opnar Fjallasýn 18. maí
Sumarið er gengið í garð á Skriðuklaustri og þakið óðum að grænka. Á fæðingardegi Gunnars, 18. maí, verður mikið um dýrðir. Þá verða opnaðar tvær sýningar. Katrín Jakobsdóttir mennta- og menningarmálaráðherra mun opna stóru sumarsýninguna Fjallasýn. Sýningin er unnin í samvinnu við Þórbergssetur og er hluti hennar á Hala í Suðursveit. Á sýningunni er fjallað um upplifun listamanna og skálda af Herðubreið, Snæfelli og Öræfajökli í listaverkum og textum. Sýnd eru verk eftir Guðmund frá Miðdal, Ásgrím Jónsson, Georg Guðna, Hring Jóhannesson, Stórval, Finn Jónsson og Þorvald Óttar. Allir velkomnir á opnun kl. 16.30. Sýningin nýtur styrks frá Menningarráði Austurlands.
PARTIAL MEMORY - sýning í gallerí Klaustri
Bandaríska listakonan Jovanna Tosello dvelur í gestaíbúðinni Klaustrinu um þessar mundir. Hún opnar sýningu á verkum sínum í gallerí Klaustri þriðjudaginn 18. maí. Sýningin stendur til 6. júní. Hægt er að nálgast frekari upplýsingar um listakonuna á heimasíðu hennar: www.jovannatosello.com.
Á MÖRKUNUM - tónleikar í samstarfi við Listahátíð í Reykjavík
Ásgerður Júníusdóttir messósópran og Jónas Sen píanóleikari flytja þekkt sönglög eftir Björk Guðmundsdóttir, Gunnar Reyni Sveinsson og Magnús Blöndal Jóhannsson. Tónleikarnir eru hluti af Listahátíð í Reykjavík. Aðeins 40 sæti í boði og því brýnt að panta miða. Verð 2900 kr. en 2500 kr. fyrir Klausturreglufélaga.
FREYJUGINNING - Christina Sunley af Vefaraætt kynnir bók sína
Fyrir nokkrum árum dvaldi Christina Sunley í Klaustrinu við bókarskrif. Hún er af íslenskum ættum, m.a.s. af Vefaraættinni í Fljótsdal, og valdi að skrifa skáldsögu byggða á sinni eigin fjölskyldusögu. Bókin er nú komin út á ensku og íslensku og mun Christina lesa úr henni og segja frá ritun hennar sunnudaginn 6. júní kl. 16. Aðgangur ókeypis og allir velkomnir.
20. apríl 2010
Sumardagurinn fyrsti og helgin:
Fiðlutónleikar, sýningaropnun og lomber
Sumardagurinn fyrsti verður að venju stór dagur hér á Skriðuklaustri. Tónleikar, opnun sýningar og kaffihlaðborð. Síðan er lomber á föstudagskvöldið kl. 20 og á laugardag og sunnudag verður opið kl. 13-17 og kaffihlaðborð hjá Klausturkaffi.
FIÐLUTÓNLEIKAR Á SUMARDAGINN FYRSTA
- Halla Steinunn Stefánsdóttir leikur Allt nema Bach
Halla Steinunn Stefánsdóttir nam fiðluleik hjá Guðnýju Guðmundsdóttur við Tónlistarskólann í Reykjavík og Elisabeth Zeuthen Schneider við Det Kongelige Danske Musikkonservatorium þaðan sem hún útskrifaðist 2001. Hún útskrifaðist frá Indiana University School of Music með P.D. í barokkfiðlu árið 2004. Halla Steinunn hefur komið fram á tónleikum og tónlistarhátíðum í Evrópu og Bandaríkjunum. Hún er stofnandi og listrænn stjórnandi Nordic Affect auk þess sem hún er í forsvari fyrir barokksveitina Camerata Drammatica.
Á efnisskrá á Skriðuklaustri eru verk eftir tónskáld frá 17. og 18. öld, Baltzar, von Biber, Vilsmayr og Telemann. En einnig verður flutt nýtt verk eftir Maríu Huld Markan Sigfúsdóttur sem kallast Sofandi pendúll.
Tónleikarnir eru hluti af Landsbyggðartónleikum FÍT.
TÓNLEIKARNIR HEFJAST KL. 15 OG AÐGANGSEYRIR ER KR. 1.000. (750 kr. fyrir Klausturreglufélagar)
MASAKI UMETSU SÝNIR Í GALLERÍ KLAUSTRI
- sýningaropnun á sumardaginn fyrsta
Masaki Umetsu er japanskur listamaður sem dvelur nú í gestaíbúðinni Klaustrinu. Hann hefur getið sér gott orð víða um lönd fyrir innsetningar sínar þar sem hann vinnur með ljós og gras sem vex upp af fræjum í formgerðu landslagi. Sýning hans í gallerí Klaustri stendur næsta mánuðinn og verður sérstaklega áhugavert að sjá hvernig verkið mun breytast dag frá degi þegar grasið fer að vaxa. Myndin hér að ofan er frá innsetningu hans Germinalabo í Centre d'art i natura í Pýreneafjöllunum.
SÝNINGAROPNUN ER SUMARDAGINN FYRSTA KL. 13-17.
7. apríl 2010
Opið næstu sunnudaga:
Tónleikar og sýningaropnun á sumardaginn fyrsta
Næstu tvo sunnudaga, 11. og 18. apríl, verður opið á Skriðuklaustri frá kl. 13-17. Kaffihlaðborð verður hjá Klausturkaffi og opið á sýningar. Sunnudagurinn 11. apríl er jafnframt síðasti sýningardagur á Via Crucis, sýningu listnema úr ME í gallerí Klaustri.
Sumardaginn fyrsta, 22. apríl verða tónleikar kl. 15 með Höllu Steinunni Stefánsdóttur og þá verður einnig opnuð sýning japanska listamannsins Masaki Umetsu í gallerí Klaustri.
Síðustu helgina í apríl verður síðan opið bæði lau. og sun. kl. 13-17. Sumaropnun hefst síðan 1. maí. og verður opið frá kl. 12-17 alla daga í maí.
26. mars 2010
Eitt listaverkanna á sýningunni Via Crucis.
Páskarnir á Skriðuklaustri:
Via Crucis og píslarganga
Að venju verður opið á Skriðuklaustri um páskana og ýmislegt um að vera. Sunnudaginn 28. mars kl. 14 verður opnuð sýning í gallerí Klaustri sem nemendur í módelteikningu á listnámsbraut Menntaskólans á Egilsstöðum hafa unnið. Sýningin tengist páskahátíðinni og fjallar um krossleiðina, via crucis. Nemendurnir taka fyrir í verkum sínum þá fjórtán staði í píslargöngu Krists sem liggja að krossfestingu og til grafar.
Föstudaginn langa, 2. apríl, efna sóknarprestar á Héraði og Gunnarsstofnun öðru sinni til píslargöngu frá Valþjófstaðarkirkju og út í Skriðuklaustur. Gangan hefst með hugvekju í kirkjunni kl. 11. Síðan verður gengið í Klaustur og áð tvisvar á leiðinni til að lesa upp úr Passíusálmum sr. Hallgríms Péturssonar. Opið verður í hádegisverð hjá Klausturkaffi að lokinni göngu.
Opið verður um hátíðirnar á Skriðuklaustri sem hér segir:
Kaffihlaðborð verður hjá Klausturkaffi alla þessa daga og hádegishlaðborð á föstudaginn langa. Lokað er á Skriðuklaustri á skírdag og páskadag.
22. desember 2009
Þorleifur Hauksson við lestur Aðventu í desember 2009.
Jólakveðjur til allra gesta og velunnara Skriðuklausturs
Gunnarsstofnun og Klausturkaffi senda öllum sem sóttu staðinn heim á árinu innilegar jólakveðjur. Síðasti viðburður ársins var þriðja sunnudag í aðventu en þá las Þorleifur Hauksson Aðventu, hina sígildu skáldsögu Gunnars Gunnarssonar, í skrifstofu skáldsins. Unun var á að hlýða en þeir sem misstu af lestrinum hafa getað hlýtt á Þorleif lesa söguna sem útvarpssögu nú síðustu vikurnar fyrir jólin. Næsti viðburður á Skriðuklaustri verður lomberkvöld fimmtudaginn 7. janúar. Ákveðið var að færa kvöldið á fimmtudag þar sem Fljótsdalshérað mun keppa í Útsvari á föstudagskvöldinu.
9. desember 2009
Arndís Þorvaldsdóttir við lestur í desember 2008.
Aðventa lesin á sunnudaginn
Sunnudaginn 13. desember verður Aðventa lesin í fimmta sinn á þriðja sunnudegi í aðventu á Klaustri. Jafnframt verður sagan lesin í Gunnarshúsi á Dyngjuvegi 8 í Reykjavík þar sem Jón Hjartarson leikari mun lesa og hefja lestur kl. 13. Á Skriðuklaustri mun lesturinn að venju hefjast kl. 14 á skrifstofu skáldsins. Kveikt verður upp í kakalofninum og heitt á könnunni. Lesari að þessu sinni er Þorleifur Hauksson fræðimaður sem einnig les söguna í útvarp fyrir þessi jól. Allir eru velkomnir í Klaustur til að njóta kyrrðarstundar í amstri desembermánaðar. Lesturinn tekur um tvær og hálfa klukkustund en gestir geta komið og farið að vild.
20. nóvember 2009
Rithöfundar, lomber, jólahlaðborð og Grýlugleði
Það er margt framundan á Skriðuklaustri eins og vanalega á þessum tíma. Fyrst ber að geta þess að rithöfundalestin rennir í hlað á fimmtudagskvöldið 26. nóvember kl. 20.30. Veður hamlaði för þeirra í fyrra en nú mæta fimm höfundar og lesa úr nýútkomnum verkum. Þeir eru:
Lesið verður upp í stássstofunni og boðið upp á kaffi og smákökur. Aðgangseyrir er kr. 1.000. Hægt verður að kaupa bækur höfundanna á staðnum og falast eftir áritunum.
Bæði föstudags- og laugardagskvöld verða jólahlaðborð hjá Klausturkaffi og er eitthvað af lausum sætum enn á báðum kvöldum. Borðapantanir eru í símam 471-2992 eða 899-8168.
Til tilbreytingar verður lomberkvöldið 27. nóvember því flutt í Hlymsdali á Egilsstöðum. Hefst það að venju kl. 20.00 og vonandi mæta sem flestir.
Sunnudaginn 29. nóvember kl. 14 er svo komið að hinni árlegu Grýlugleði. Þar munu að venju gaulálfar og sagnálfar leika lausum hala en hver veit nema gömlu hjónin láti sjá sig að leita einhvers í svanginn. Þegar eru farin að berast kvæðiskorn um Leppalúða og jólaköttinn frá grunnskólabörnum og verða valin ljóð sungin og flutt á Grýlugleðinni. Að henni lokinni verður jólakökuhlaðborð hjá Klausturkaffi.
12. nóvember 2009
Lúðvík Kemp og súkkulaðikökur
Sunnudaginn 15. nóvember kl. 14 mun Hjalti Pálsson fræðimaður úr Skagafirði flytja erindi um hagyrðinginn Lúðvík Kemp sem var austfirskur að ætt en bjó í Skagafirði. Kveðskapur Lúðvíks þótti oft á tíðum ekki prenthæfur á sinni tíð en eftir hann liggur mikið safn lausavísna. Að loknu erindinum verður súkkulaðikökuhlaðborð hjá Klausturkaffi í tilefni Daga myrkurs.
12. nóvember 2009
Aðventa - velheppnuð fjallaferð
Ferð í fótspor Fjalla-Bensa var farið laugardaginn 7. nóvember. Veður var gott og færð með eindæmum góð. Ekki þurfti að leggja á stórjeppa að þessu sinni heldur nægðu óbreyttir jeppar til fararinnar. Að venju var áð fyrst við Péturskirkju austan í Hrauntöglunum og þar sagði Arngrímur Geirsson í Álftagerði frá Benedikt Sigurjónssyni og hvernig eftirleitum var háttað á þessu svæði. Pétur Eggerz leikari leiddi okkur svo inn í sögu Gunnars Gunnarssonar af Fjalla-Bensa. Frá Péturskirkju var farið að stórum hraunhelli sem gangnamenn nýttu stundum og er skammt frá afleggjaranum að Dettifossi. Hann er kallaður Klaustur. Að svo búnu var haldið að Sæluhúsinu við Jökulsá og rifjaðar upp draugasögur og fleira af þeim slóðum. Eftir að hafa snætt nesti var svo brunað inn með Jökulsá og alla leið inn að kofanum Tumba sunnan í Miðfelli þar sem áður var niðurgrafin hola, ein af mörgum sem Bensi nýtti sér í vonskuveðrum förum daga. Ferðinni lauk síðan í Möðrudal þar sem snædd var kjötsúpa og Pétur Eggerz lék lokaatriði sögunnar. En myndirnar tala sínu máli.
19. október 2009
Aðventa - leiksýningar og fjallaferð á Dögum myrkurs
Ferðafélag Fljótsdalshéraðs tekur við skráningu á This email address is being protected from spambots. You need JavaScript enabled to view it. og í síma 863-5813. Sætið kostar 9.500 kr. og ef menn koma á eigin bílum er þátttökugjald 2.000 kr. á manninn.
Skráningarfrestur í ferðina hefur verið framlengdur til kl. 16 fimmtudaginn 5. nóv.
12. október 2009
Liv Skrudland og Karin Nielsen.
Frábærir tónleikar
Tónleikar þeirra Liv og Karin frá Vesteralen sl. sunnudag var velheppnaðir og var það rómur þeirra sem á hlýddu að þeir hefðu verið hreint út sagt frábærir. Á efnisskránni voru bæði samtímaverk og þjóðlög frá bæði Noregi og Íslandi og fléttuðu þær stöllur þau snilldarlega saman svo úr varð 50 mínútna tónlistarveisla. Inn á milli lásu þær ljóð. Óhætt er að mæla með þessu prógrammi en þær munu halda tónleika bæði á Eskifirði á morgun þriðjudag og Borgarfirði á miðvikudagskvöld. Á föstudaginn yfirgefa þær Austurland en munu ljúka dvöl sinni hérlendis með því að spila á tónleikum á Gljúfrasteini.
5. október 2009
Liv Skrudland og Karin Nielsen.
Í vestur - í austur
Tónfundur Íslands og Noregs sunnudaginn 11. okt.
Sunnudaginn 11. október verða haldnir tónleikar á Skriðuklaustri þar sem söngkonan Liv Skrudland og sellóleikarinn Karin Nielsen flytja norsk og íslensk lög. Listamennirnir koma frá Norður-Noregi og hafa að undanförnu dvalist í gestaíbúðinni Klaustrinu og er dvölin hluti af samstarfi menningarráðanna í Vesterålen og á Austurlandi. Liv Skrudland lærði við Rogaland Musikkonservatorium. Hún er alhliða söngvari en þekkt fyrir túlkun sína á kammertónlist og ljóðatónleika. Karin Nielsen nam sellóleik bæði í Svíþjóð og Noregi og hefur m.a. spilað með Fílharmóníusveitinni í Osló en vinnur nú sem svæðistónlistarmaður í Tromsfylki.
Á Skriðuklaustri hafa þær Liv og Karin æft nýja efniskrá sem byggir á samtímatónlist og þjóðlögum frá báðum löndum. Á tónleikunum munu þær m.a. flytja lög eftir Þorstein Hauksson og Sommerfeldt í bland við þekkt kvæði eins og Sofðu unga ástin mín, Snert hörpu mína og kvæði Olavs H. Hauge. Þær munu flytja sömu efnisskrá á tónleikum á Gljúfrasteini í Mosfellssveit laugardaginn 17. október. Tónleikarnir á Skriðuklaustri hefjast kl. 15 og aðgangur er ókeypis. Opið verður hjá Klausturkaffi bæði fyrir og eftir tónleikana.
Elzbieta á Skriðuklaustri 2007.
24. september 2009
Eitt og annað á döfinni á Klaustri
LOMBER
Annað kvöld, föstudagskvöldið 25. sept. kl. 20 hefst spilamennska vetrarins. Lomberinn lifnar við og verður spilað á þriggja vikna fresti fram að jólum. Endilega takið með ykkur nýliða. Ekki veitir af að fjölga fyrir lomberslaginn við Húnvetninga sem ekki verður blásinn af þennan veturinn.
TÓNLEIKAR Á SUNNUDAGINN
Á sunnudaginn, 27. sept. kl. 15 verða tónleikar í tilefni af Alþjóðlega tónlistardeginum. Þar mun Elzibieta Arsso-Cwalinska sópran syngja við undirleik Árna Ísleifssonar íslensk og erlend lög. Aðgangseyrir er 1.000 kr. en frítt fyrir ellilífeyrisþega og 16 ára og yngri.
SÍÐASTA HELGAROPNUNIN
Komandi helgi er síðasta helgaropnunin, þ.e. opið kl. 12-17 bæði laugardag og sunnudag á Skriðuklaustri. Opið verður hjá Klausturkaffi og þeir sem ekki hafa séð sýningu Þórunnar Eymundar og Hönnu Christel í gallerí Klaustri ættu að drífa sig að líta við. Þá fer að fækka sýningardögum á Ævintýrinu 1939 þar sem bygging Gunnarshúss er sérstaklega tekin fyrir.
OPIÐ Á SUNNUDÖGUM Í OKTÓBER
Ákveðið hefur verið að hafa opið kl. 13-17 fyrstu þrjá sunnudagana í október og verða ofangreindar því ekki teknar niður fyrr en eftir 18. október.
Innsetningin "þegar ég hef svæft sjálfan mig" í gallerí Klaustri.
14. september 2009
Haustið komið og helgaropnun til loka september
Hinni daglegu opnun lauk 13. september en frá 1. maí hefur fjöldi ferðamanna og heimamanna lagt leið sína í Skriðuklaustur. Opið verður næstu tvær helgar kl. 12-17 nema hvað laugardaginn 19. sept. verður opnað eftir Melarétt eða um kl. 14. Klausturkaffi verður opið á sama tíma. Þeir sem enn eiga eftir að skoða sýninguna um Ævintýrið 1939, þ.e. um byggingu hússins hafa því enn tækifæri. Sömuleiðis verður sýning Þórunnar Eymundardóttur og Hönnu Christel Sigurkarlsdóttur opin til septemberloka í gallerí Klaustri. Sunnudaginn 27. september kl. 15 verða síðan tónleikar á Skriðuklaustri á Degi tónlistarinnar. Nánar um það síðar.
24. ágúst 2009
Fjör á Fljótsdalsdegi
Hinn árlegi Fljótsdalsdagur Ormsteitis var haldinn sunnudaginn 23. ágúst. Hann tókst með ágætum þó að veðurguðirnir væru sparsamir á sólina. Nokkrir gengu niður Tröllkonustíginn og kátir krakkar reyndu að krækja í silung í Bessastaðaánni. Eftir grill í Víðivallaskógi var síðan dagskrá á Skriðuklaustri þar sem LAY LOW hélt útitónleika á aðalstéttinni sem um 300 manns hlýddu á. Að þeim loknum tóku við hefðbundnir Þristarleikar með rababarakasti, pokahlaupi og fjárdrætti. Einnig var keppt um bestu sulturnar og lengsta rababaralegginn. Deginum lauk síðan með guðsþjónustu á rústum hins forna Skriðuklausturs. En myndirnar tala sínu máli.
20. ágúst 2009
Hinn árlegi Fljótsdalsdagur Ormsteitis verður sunnudaginn 23. ágúst. Hann hefst með gönguferð niður Tröllkonustíginn og veiðikeppni í Bessastaðaá. Mæting í hvoru tveggja er kl. 10, í veiðikeppnina við Melarétt en í gönguferðina við Végarð. Í hádeginu er boðið upp á pylsugrill í veislurjóðri Víðivallaskógar þar sem úrslit í veiðikeppni verða tilkynnt. Hádegisverðarhlaðborð er að venju hjá Klausturkaffi. Klukkan 14.00 hefst dagskrá á Skriðuklaustri með stórtónleikum LAY LOW. Að þeim loknum taka við hinir óborganlegu Þristarleikar. Á þeim verður að venju keppt í pokahlaupi, fjárdrætti og rababarakasti. Sultukeppnin verður á sínum stað og keppt í tveimur flokkum, rababarasultum og öðrum sultum. Þá verður keppt um lengsta rababaralegginn. Gert er ráð fyrir að Þristarleikum verði lokið kl. 16.30 og þá verður guðsþjónusta við rústir klaustursins forna. Sr. Davíð Tencer, prestur kaþólsku kirkjunnar á Kollaleiru, og sr. Cecil Haraldsson sóknarprestur á Seyðisfirði þjóna. Ormsteiti mun ljúka með þessari athöfn við klausturrústirnar.
Frítt er á alla viðburði í Fljótsdal en þeir sem standa að deginum eru Fljótsdalshreppur, Gunnarsstofnun, Klausturkaffi og Þristurinn ásamt skógarbændum á Víðivöllum, landeigendum að Bessastaðaá og fleirum.
Fjör á sunnudaginn á Fljótsdalsdegi
- tónleikar með LAY LOW
19. júlí 2009
Frá fornleifauppgreftri.
Fræðandi sýningar, list, leiðsögn og fornleifar
Margt er um manninn alla daga á Skriðuklaustri um þessar mundir. Gestir koma hvaðanæva að úr heiminum þó að mest sé um Íslendinga. Enda margt að skoða og fræðast um. Fornleifafræðingar eru að störfum í klausturrústum neðan Gunnarshúss og er leiðsögn um fornleifasvæðið eftir hádegi alla daga. Í Gunnarshúsi stendur í allt sumar stór sýning um ævintýrið 1939 þegar húsið var byggt á aðeins nokkrum mánuðum. Á sýningunni getur m.a. að líta einstök kvikmyndabrot af Gunnari á Skriðuklaustri sumarið 1939 sem uppgötvuðust í fyrra á Kvikmyndasafni Íslands. Í gallerí Klaustri stendur yfir sýning Söndru Mjallar Jónsdóttur, Aðlögun, og um 10. ágúst tekur við sýning á verkum Piotr Nathan. Að sjálfsögðu er Klausturkaffi síðan opið alla daga kl. 10-12 með hádegis- og kaffihlaðborð og hægt að sitja og sleikja sólina á suðurstéttinni þegar þannig viðrar og taka léttan kubbleik eða krokkett.
30. júní 2009
Stjórn Skriðuklaustursrannsókna skoðar fornleifauppgröftinn.
Fornleifar, ljósmyndir, sýning um ævintýrið 1939 og margt fleira
Skriðuklaustur iðar af lífi þessa dagana. Fornleifafræðingar eru að störfum í klausturrústum neðan Gunnarshúss. Að venju er leiðsögn um fornleifasvæðið og er hún nú á klukkustundarfresti eftir hádegi alla daga. Í Gunnarshúsi stendur í allt sumar stór sýning um ævintýrið 1939 þegar húsið var byggt. Á sýningunni getur m.a. að líta einstök kvikmyndabrot af Gunnari á Skriðuklaustri sumarið 1939 sem uppgötvuðust í fyrra á Kvikmyndasafni Íslands. Í gallerí Klaustri hefst um næstu helgi sýning Söndru Mjallar Jónsdóttur sem er útskrifuð í ljósmyndun frá LHÍ og Bretlandi. Að sjálfsögðu er Klausturkaffi síðan opið alla daga kl. 10-12 með hádegis- og kaffihlaðborð og hægt að sitja og sleikja sólina á suðurstéttinni.
30. júní 2009
Staðarhaldari lætur af störfum
Halldóra Tómasdóttir sem verið hefur staðarhaldari á Skriðuklaustri síðustu þrjú ár lætur af störfum nú um mánaðamótin. Hún hefur haft umsjón með gestaíbúðinni Klaustrinu og innanhússtarfsemi á Skriðuklaustri ásamt fleiru. Halldóru eru þökkuð góð störf síðustu árin en hún hyggur á frekara nám með haustinu. Þeim sem hafa verið í sambandi við staðarhaldara vegna Klaustursins eða annarra mála er bent á að snúa sér til forstöðumanns, Skúla Björns Gunnarsonar, en hann hefur netfangið This email address is being protected from spambots. You need JavaScript enabled to view it..
30. maí 2009
Sumarblómin komin og ný sýning í gallerí Klaustri
Í dag hefst sumartíminn á Klaustri og héðan í frá verður opið kl. 10-18 alla daga fram á haust. Sumarblómin eru komin á sinn stað allt í kringum Gunnarshús og fyrsti sláttur búinn. Klausturkaffi býður að sjálfsögðu upp á hádegis- og kaffihlaðborð alla daga með áherslu á austfirskar krásir og kökur og brauð bökuð á staðnum.
Á morgun sunnudag opnar kanadíska listakonan, rithöfundurinn og mannfræðingurinn Rae Bridgman sýningu í gallerí Klaustri. Hún er þekktust fyrir fantasíubækur fyrir unglinga og myndskreytir þær einnig. Hægt er að skoða nokkrar af myndum hennar á neðangreindri síðu.
http://www.raebridgman.ca/gallery/index.html
19. maí 2009
Sigurjón Björnsson prófessor emeritus ræddi um Brimhendu.
Velheppnað málþing í tilefni stóra hundraðsins
Málþingið sem haldið var í gær í Þjóðarbókhlöðu í samstarfi við Bókmenntafræðistofnun HÍ og Landsbókasafn Íslands – Háskólabókasafn tókst með ágætum. Fyrirlesararnir þrír fluttu athyglisverð erindi um verk Gunnars og voru það fyrst og fremst Brimhenda, Vikivaki og Aðventa sem tekin voru til umfjöllunar þó að fleiri bæri á góma. Í lokin stýrði Jón Yngvi Jóhannsson síðan skemmtilegum pallborðsumræðum sem salurinn tók virkan þátt í með áhugaverðum spurningum og hugleiðingum.
Jón Karl Helgason talaði um Vikivaka og Sveinn Yngvi Egilsson um Aðventu.
Jón Yngvi og Sigurjón Björnsson í hrókasamræðum í pallborðinu.
18. maí 2009
120 ár liðin frá fæðingu Gunnars skálds
Í dag eru liðin 120 ár frá því Gunnar Gunnarsson fæddist á Valþjófsstað í Fljótsdal. Af því tilefni verður málþing um skáldið í Þjóðarbókhlöðu í dag kl. 17 (sjá nánar hér að neðan) og er það opið öllum meðan húsrúm leyfir. Þá hefur RUV opnað fyrir niðurhal inni á hlaðvarpinu á frábærum lestri Gunnars frá 1956 á skáldsögunni Svartfugli í þýðingu Magnúsar Ásgeirssonar.
14. maí 2009
Af einkasyni hugumstórra fjalla
- málþing á mánudaginn í Þjóðarbókhlöðu í tilefni þess að 120 ár eru liðin frá fæðingu Gunnars skálds
Stofnunar Gunnars Gunnarssonar, Bókmenntafræðistofnun Háskóla Íslands og Landsbókasafn Íslands - Háskólabókasafn bjóða til málþings í fyrirlestrasal Þjóðarbókhlöðu mánudaginn 18. maí kl. 17 í tilefni þess að þá verða 120 ár liðin frá fæðingu Gunnars Gunnarssonar skálds.
Dagskrá:
Aðgangur er ókeypis og allir velkomnir meðan húsrúm leyfir.
5. maí 2009
Frá opnun sýningarinnar 1. maí
ÆVINTÝRIÐ 1939
- opið alla daga
Föstudaginn 1. maí var opnuð sýning á Skriðuklaustri í tilefni 70 ára frá byggingu hins einstæða húss Gunnar sem kallast Ævintýrið 1939. Á sýningunni kennir ýmissa grasa og þar er er reynt að varpa ljósi á hversu gríðarlega stór framkvæmd þetta var á sínum tíma þó að aðeins hluti allra þeirra bygginga sem Gunnar ætlaði sér að byggja hafi risið. Tekið hefur verið saman yfirlit úr vinnudagbók yfirsmiðsins frá árinu 1939 og þar koma 65 nöfn við sögu sem skiluðu um 32.000 vinnustundum á sjö mánuðum.
Sýningin er opin alla daga kl. 12-17 og frá og með 1. júní verður opið kl. 10-18.
30. apríl 2009
Teikning Fritz Högers af herragarðinum Skriðuklaustri.
ÆVINTÝRIÐ 1939
- 70 ár frá byggingu Gunnarshúss á Skriðuklaustri
Föstudaginn 1. maí verður opnuð sýning á Skriðuklaustri í tilefni 70 ára frá byggingu hins einstæða húss Gunnars Gunnarssonar skálds. Á sýningunni er í máli og myndum sagt frá þessu ótrúlega ævintýri 1939 þar sem hátt í hundrað manns unnu sex daga vikunnar frá vori og fram að jólum við að reisa stórhýsið.
Rannsóknir fræðimanna við undirbúning sýningarinnar hafa leitt ýmislegt nýtt í ljós. Meðal annars er sýnd teikning sem Gunnar og Jóhann Fr. Kristjánsson gerðu að íbúðarhúsi áður en góðvinur Gunnars, þýski arkitektinn Fritz Höger, bauðst til að teikna herragarðinn. Þá er á sýningunni fjallað um sögusögnina um að sami arkitekt sé að húsinu og Arnarhreiðrinu.
Vegna sýningarinnar er búið að vinna líkan sem sýnir herragarðinn í heild sinni eins og hann átti að verða með öllum útihúsum. Teikningar eru til af stóru heildarmyndinni og er grunnflötur þeirra bygginga sem aldrei risu yfir 2000 fermetrar.
ÆVINTÝRIÐ 1939 er aðalsumarsýning Gunnarsstofnunar og stendur fram á haust. Með opnun hennar hefst sumaropnun á Skriðuklaustri. Frá og með 1. maí er opið á Skriðuklaustri alla daga kl. 12-17 og 1. júní lengist opnunartíminn í kl. 10-18.
20. apríl 2009
Þjóðlegir tónar á sumardaginn fyrsta
Marta Guðrún Halldórsdóttir sópran og Örn Magnússon píanóleikari verða með þjóðlega tónlistarstund á Klaustri á sumardaginn fyrsta kl. 15.00.
Örn og Marta hafa starfað saman um margra ára skeið. Þau hafa lagt rækt við íslenska tónlist, bæði nýja og gamla og þá ekki síst fengist við þjóðlög í ýmsum búningi. Þau hafa gefið út geisladisk með þjóðlagasafni Engel Lund og nú eru væntanlegir tveir nýir þjóðlagadiskar, annar með útsetningum Hildigunnar Rúnarsdóttur en hinn geymir lög sem þau hafa útsett sjálf og flutt með fjölskylduhljómsveit sem ber heitið Spilmenn Ríkínís. Þar nota þau gömul íslensk hljóðfæri sem vitað er að til voru hér á landi til forna s.s. langspil, simfón og gýju. Á tónleikunum á sumardaginn fyrsta munu þau gefa áheyrendum sýnishorn af hvoru tveggja og flytja tónlist úr þjóðlagasafni Bjarna Þorsteinssonar, úr safni Engel Lund og tónlist sem varðveitt er í tónlistarhandritunum Melodiu og Hymnodiu við undirleik hinna ýmsustu hljóðfæra, allt frá píanói til gemsuhorns.
Tónleikarnir eru í samstarfi við Félag íslenskra tónlistarmanna og hluti af landsbyggðartónleikum 2009. Aðgangseyrir er kr. 1.000 fyrir fullorðna en frítt fyrir 16 ára og yngri.
Opið er á Skriðuklaustri kl. 14-17 á sumardaginn fyrsta og einnig laugard. og sunnud. 25-26. apríl.
16. apríl 2009
Skóflustunga tekin að gestastofu Vatnajökulsþjóðgarðs
Kolbrún Halldórsdóttir umhverfisráðherra tók skóflustungu að gestastofu Vatnajökulsþjóðgarðs í dag 16. apríl. Ljúka á byggingu hennar fyrir 15. maí 2010. Í gestastofunni verður sett upp sýning um þjóðgarðinn og þar verður meginstarfsstöð þjóðgarðsins á austursvæði hans. Húsið verður hið fyrsta hér á landi sem byggt verður samkvæmt alþjóðlegum vottuðum vistvænum stöðlum en það er hannað af Arkís (www.arkis.is).
6. apríl 2009
Sr. Sigurjón á Kirkjubæ með fermingarbörn á Eiðum 1955. Mynd frá Ljósmyndasafni Austurlands.
Píslarganga, fermingasýning og páskaopnun
Laugardaginn 4. apríl kl. 14 var opnuð sýning um fermingar á miðri síðustu öld á Skriðuklaustri. Sýningin er hluti af verkefninu Sagnalist, sem unnið er í samstarfi Gunnarsstofnunar og Þórbergsseturs með styrk frá Menningarráði Austurlands, og felst í að safna frásögnum eldra fólks. Á sýningunni á Klaustri er brugðið upp nokkrum minningarbrotum, sýndar gamlar fermingarmyndir, gjafir og fatnaður frá einstaklingum sem fermdust um miðja 20. öld. Sýningin verður opin í apríl.
Á föstudaginn langa verður gengin píslarganga frá Valþjófsstað í Skriðuklaustur í samstarfi við prestana á Héraði. Gangan hefst með hugvekju í Valþjófsstaðakirkju kl. 11. Síðan verður gengið í Skriðuklaustur og áð tvisvar á leiðinni til að lesa upp úr Passíusálmum sr. Hallgríms. Klausturkaffi verður með opið í hádegisverð að lokinni göngunni.
Opnunartími á Skriðuklaustri næstu vikur:
Aðgangseyrir 500 kr. Frítt fyrir 16 ára og yngri og 50% afsláttur fyrir eldri borgara.
Borðin svigna undan kræsingum á kaffihlaðborði Klausturkaffis á opnunartíma.
Wilfried Agricola de Cologne, stjórnandi CologneOFF.
17. mars 2009
Hreindýraland á sunnudaginn
- lomber á föstudag og leshringur á þriðjudag
Lomberkvöld verður nk. föstudagskvöld kl. 20. Rætt verður um lomberslag við Húnvetninga.
Skriðuklaustur tekur að venju þátt í 700IS Hreindýralandi. Að þessu sinni verður sýnt úrval mynda af CologneOFF IV hátíðinni. Um er að ræða stuttmyndir frá ýmsum löndum. Sjá nánar hér. eða á vefnum www.700.is. Sýningar verða frá kl. 14-18 bæði sunnud. 22. mars og laugard. 28. mars. Klausturkaffi verður með kaffihlaðborð báða daga. Þá verður einnig opið kl. 14-17 sunnud. 29. mars.
Í tilefni Hreindýralandsins verður Klausturkaffi með hreindýrabrunch sunnudaginn 22. mars kl. 12-14 þar sem áherslan verður lögð á hreindýrakjöt. Verð í brunch er kr. 2500 en hálft fyrir 6-12 ára og yngri en 6 ára fá frítt.
Leshringur verður á þriðjudagskvöld 24. mars kl 20. Þá verður lokið við Fjallkirkjuna og síðasta bindi hennar, Hugleikur, tekið til umræðu.
Guðjón Daníelsson og Björn Magni Björnsson glaðbeittir við spilaborðið í fyrra.
25. febrúar 2009
Lomberdagur á laugardag
- opið allan daginn hjá Klausturkaffi
Hinn árlegi lomberdagur verður nk. laugardag, 28. febrúar. Að venju eru byrjendur boðnir sérstaklega velkomnir og munu fá leiðsögn um lomber og lítið kver. Mælt er með því að þeir mæti kl. 13 en spilamennskan mun hefjast kl. 13.30. Spilað verður fram á rauða nótt með viðeigandi kaffi- og matarhléum. Spilamenn geta bæst inn hvenær sem er. Þátttökugjaldið ræðst af því hvað menn eru lengi og þurfa mikla næringu:
Basti (síðdegiskaffi) kr. 1.500 (1.350 kr. fyrir Klausturreglu)
Manilía (kvöldverður) kr. 3.900 (3.500 kr. fyrir Klausturreglu)
Spadda (síðdegiskaffi og kvöldverður) kr. 4.900 (4.400 kr. fyrir Klausturreglu)
Opnað verður á Klaustri kl. 12 og verður Klausturkaffi líka með hádegisverð fyrir gesti og gangandi. Veitingastofan verður opin allan daginn ef að menn vilja kíkja í hádegi, kaffi eða kvöldverð og sjá fjöruga spilamennsku.
17. febrúar 2009
Erindi um lýðræði og kræsingar á konudegi
Konudaginn 22. febrúar verður opið á Klaustri frá kl. 12-17 og verður Klausturkaffi með hlaðborð í tilefni dagsins, bæði hádegishlaðborð og kaffihlaðborð með bolludagsívafi. Vilhjálmur Árnason heimspekingur mun síðan ræða um lýðræði í konudagsspjallinu sem hefst kl. 15.00.
Þann 24. febrúar kl. 20 verður síðan haldið áfram með leshring um Fjallkirkjuna og er það Óreyndur ferðalangur sem nú er tekinn fyrir. Á síðasta degi mánaðarins, laugardaginn 28. febrúar verður síðan hinn árlegi lomberdagur þar sem vanir og óvanir lomberspilarar geta notið þess að spila þetta fornfræga spil frá hádegi og fram á nótt. Klausturkaffi mun hafa opið allan lomberdaginn fyrir þá sem vilja líta við og bjóða upp á hádegis, kaffi og kvöldverðarhlaðborð.
5. febrúar 2009
Janúardvalanum lokið og margt um að vera í febrúar
Upp er runnið nýtt ár og ný ríkisstjórn sest að völdum. Á Skriðuklaustri gengur þó lífið sinn vanagang og nú er janúardvalanum lokið. Á döfinni í febrúar er eitt og annað. Lomberinn sem átti að vera föstudagskvöldið 13. febrúar er fluttur á fimmtudaginn 12. febrúar kl. 20 þar sem Fljótsdalshérað keppir í Útsvari á föstudagskvöldið við Akureyri. Laugardaginn 14. febrúar verður Rannsóknaþing Austurlands 2009 haldið að Skriðuklaustri og stendur frá kl. 11-17. Dagskrá þess er hægt að sjá á vef Þekkingarnets Austurlands en meðal fyrirlesara verða dr. Steinunn Kristjánsdóttir, sem fjallar um fornleifarannsóknina á Klaustri, og Jón Yngvi Jóhannsson, sem segir frá rannsóknum sýnum á Gunnari Gunnarssyni. Á Rannsóknaþinginu verður ennfremur fjallað um grundvöll fyrir stofnun akademíu á Austurlandi.
Konudaginn 22. febrúar verður opið á Klaustri frá kl. 14-17 og verður Klausturkaffi með hlaðborð í tilefni dagsins. Þann 24. febrúar kl. 20-22 verður síðan haldið áfram með leshring um Fjallkirkjuna. Á síðasta degi mánaðarins, laugardaginn 28. febrúar verður síðan hinn árlegi lomberdagur þar sem vanir og óvanir lomberspilarar geta notið þess að spila þetta fornfræga spil frá hádegi og fram á nótt.
20. desember 2008
Arndís Þorvaldsdóttir las á Skriðuklaustri.
Vellukkaður Aðventulestur og jólakveðjur
Sunnudaginn 14. desember var Aðventa lesin á þremur stöðum, á Skriðuklaustri, í Gunnarshúsi í Reykjavík og í Jónshúsi í Kaupmannahöfn. Lesið var á sama tíma alls staðar og tók lesturinn um þrjár klukkustundir með smáhléum. Á Skriðuklaustri lásu Arndís Þorvaldsdóttir og Dagný Pálsdóttir. Í Reykjavík las Þórarinn Eldjárn og í Kaupmannahöfn lásu Svavar Gestsson og Guðrún Ágústsdóttir ásamt fleirum.
Viðburður þessi var í samstarfi við Rithöfundasamband Íslands og Sendiráð Íslands í Danmörku. Stefnt er að því hjá Gunnarsstofnun að fjölga stöðum sem Aðventa er lesin á þriðja sunnudag í aðventu á næsta ári og gera þetta að föstum viðburði. Sagan er enda klassísk og á erindi við alla.
Jólahátíðin fer í hönd innan fárra daga og starfsfólk Gunnarsstofnunar, Klausturkaffis og Skriðuklaustursrannsókna senda öllum þeim sem sóttu staðinn heim á árinu bestu jóla- og nýjárskveðjur.
8. desember 2008
Vísindavaka á aðventu
Samstarfsfélag um Vísindagarð og Gunnarsstofnun bjóða til vísindavöku kl. 16.30 fimmtudaginn 11. des. á Skriðuklaustri. Á dagskrá verða tvö erindi. Halldóra Tómasdóttir staðarhaldari á Skriðuklaustri segir frá verkefninu Sagnalist sem unnið hefur verið í samstarfi Gunnarsstofnunar og Þórbergsseturs og snýst m.a. um að safna minningum eldra fólks um fermingar. Þá munu Ari Hallgrímsson og Halldór K. Halldórsson segja frá heiðarbýlum upp af Vopnafirði.
Fiskisúpa, brauð og kaffi í boði Samstarfsfélags um Vísindagarð. Allir velkomnir.
7. desember 2008
Gaulálfarnir Gauli og Rauli voru hræddir við hjónin.
Velheppnuð Grýlugleði
Grýlugleðin sem fram fór 30. nóvember tókst í alla staði vel og Grýla og Leppalúði létu sig ekki vanta. Sagnaálfar og gaulálfar skemmtu börnunum og tókst með góðri hjálp þeirra að hrekja óvættina á braut. Húsið á Skriðuklaustri er annars grýlum prýtt þessa dagana því að vel á annað hundrað grýlur frá austfirskum grunnskólabörnum eru þar til sýnis. Á Grýlugleðinni voru afhentar viðurkenningar fyrir handgerðar grýlur.
Grunnskóli Borgarfjarðar fékk viðurkenningu fyrir frumlegustu grýluna.
Hallormsstaðaskóli fékk viðurkenningu fyrir ógurlegustu grýluna.
Héðinn Sölvi Halldórsson í 4. bekk Seyðisfjarðarskóla fékk viðurkenningu fyrir skemmtilegustu grýluna.
Laufey Sverrisdóttir í 6. bekk Fellaskóla fékk viðurkenningu fyrir sætustu grýluna.
Sagnaálfurinn Dvalinn var mættur að vanda.
Sagnaálfarnir Ögn, Agnarögn og Agnaragnarögn.
Krakkar úr Hallormsstaðaskóla taka við viðurkenningu.
24. nóvember 2008
RITHÖFUNDARLESTIN MISSIR AF SKRIÐUKLAUSTRI VEGNA VEÐURS. UPPLESTRI SEM VERA ÁTTI Í KVÖLD FIMMTUDAG ER AFLÝST VEGNA ÓVEÐURS OG ÓFÆRÐAR.
Rithöfundalestin og Grýlugleði
Nú er tími hinna árvissu viðburða á Skriðuklaustri sem annars staðar. Á fimmtudagskvöldið kl. 20. rennir rithöfundalestin í hlað. Að þessu sinni eru það Hugleikur Dagsson, Rannveig Þórhallsdóttir, Ævar Örn Jósepsson og Jón Hallur Stefánsson sem koma og lesa úr verkum sínum. Kaffi og kökur og stemning við arineldinn í stássstofunni, aðgangur kr. 1000 (veitingar innifaldar) Lestin er að venju í samstarfi við Vopnfirðinga og Seyðfirðinga.
Grýlugleðin verður síðan sunnudaginn 30. nóv. og hefst kl. 14.00. Búast má við gaulálfum og sagnaálfum og mikil hætta á að Grýla og Leppalúði láti sjá sig. Hægt verður að skoða ógrynni af handgerðum grýlum sem grunnskólabörn á Austurlandi hafa sent til Gunnarsstofnunar og veitt verður viðurkenning til þess bekkjar eða skóla sem skaraði fram úr í grýlugerðinni. Ekkert kostar inn á Grýlugleðina. Að sjálfsögðu verður síðan jólakökuhlaðborð hjá Klausturkaffi eftir öll ólætin.
11. nóvember 2008
Herragarðskvöld og ljóðalestur
Á Dögum myrkurs er nóg um að vera á Skriðuklaustri. Miðvikudagskvöldið 12. nóvember verður Nótt og draumur, þriðja bindi Fjallkirkjunnar tekið til umfjöllunar í leshring sem allir er velkomnir að koma í og hefst hann kl. 20.00. Á föstudagskvöldið 14. nóv. verður spilaður lomber frá kl. 20 og fram á rauða nótt. Nýliðar alltaf velkomnir.
Laugardagskvöldið 15. nóvember býður Klausturkaffi upp á seiðandi kræsingar á herragarðskvöldverði. Þar verður tekið á móti fólki með bláberjadrykk og snittum og meðal þess sem á borð verður borið eru: heitreyktar lambalundir, laxarúlla með wasabi, grafinn hreindýravöðvi, grillaðar gæsabringur, nautalundir og lerkisvepparisottó. Húsið verður opnað kl. 18.30 og eftir að kvöldverði lýkur verður létt draugakvöldvaka í stássstofunni með blandaðari dagskrá. Hefst hún kl. 21.00 og er aðgangur ókeypis.
Sunnudaginn 16. nóvember, sem jafnframt er Dagur íslenskrar tungu, verður blásið til ljóðadagskrár kl. 14. Þar munu ljóðskáldin Ingunn Snædal, Sigurður Ingólfsson og Þorsteinn Bergsson lesa úr eigin verkum en einnig sín uppáhaldsljóð eftir þjóðskáldið Jónas Hallgrímsson. Aðgangur er ókeypis á dagskrána. Klausturkaffi verður með súkkulaðikökuhlaðborð og er húsið opið kl. 14-17.
10. nóvember 2008
Frá Aðventuferð í nóvember 2008. Myndirnar tók Skúli Björn.
FJALLAFERÐ Á SLÓÐIR BENSA OG AÐVENTU
Laugardaginn 8. nóvember efndi Gunnarsstofnun til ferðar á söguslóðir Aðventu á Mývatnsöræfum í samstarfi við 4x4 deildir og ferðafélögin á Húsavík og Fljótsdalshéraði. Um tuttugu manns rifjuðu saman upp skáldsögu Gunnars Gunnarssonar og sagnir af fyrirmynd aðalpersónunnar, Benedikt Sigurjónssyni, sem var einn af þeim þrautseigu mönnum er eyddu dögum og vikum á hverju ári á fyrri hluta síðustu aldar til að bjarga fé af fjöllum í vetrarhörkum. Með í för var Arngrímur Geirsson í Álftagerði sem í æsku hafði kynni af Bensa og hann sagði sögur af honum en lýsti einnig vel þeim aðstæðum sem eftirleitarmenn þurftu að takast á við. Oftar en ekki komust menn í hann krappann í óveðrum en fengu ekki þíðviðri og auða jörð á öræfum eins og ferðahópurinn á laugardaginn.
Ferðin hófst við gangnamannakofann Péturskirkju í Hrauntöglum og þar brá Pétur Eggerz leikari upp mynd af Bensa, sauðinum Eitli og hundinum Leó, úr leikgerð Möguleikhússins af Aðventu. Þaðan var haldið að Sæluhúsinu við Jökulsá sem byggt var 1881 og því ein fárra bygginga sem enn standa frá þeim tíma sem saga Gunnars gerist á og Benedikt Sigurjónsson gisti. Sæluhúsið er í húsasafni Þjóðminjasafns Íslands en þarfnast orðið verulegra endurbóta. Ekki var talið óhætt að senda fleiri en þrjá inn í einu til að skrifa í gestabók hússins.
Frá Sæluhúsinu var haldið á jeppunum inn með Jökulsá eftir Öskjuleið. Á rúmum klukkutíma var lögð að baki leið sem tók Bensa um átta klukkustundir að komast í góðu færi á sínum tíma. Áð var við kofann Tumba austan í Miðfelli sem er um það bil miðja vegu frá þjóðveginum og inn í Herðubreiðarlindir. Þar kúrir utan í fellinu hlaðinn kofi sem reistur var á sama stað og áður var niðurgrafinn gangnamannagrýta. Henni er vel lýst, bæði í sannri frásögn Þórðar Jónssonar af ferðum Benedikts Sigurjónssonar á aðventu 1925, sem birtist í Eimreiðinni 1931 og varð kveikjan að skáldsögu Gunnars, sem og í sögunni Aðventu þegar Bensi finnur í hríðarbyl afdrep neðanjarðar.
Hópurinn hélt aftur til byggða frá Miðfelli og endaði ferðin um söguslóðir í Möðrudal á Fjöllum. Þar fengu menn kraftmikla kjötsúpu hjá ferðaþjónustubændum Fjalladýrðar og síðan setti Pétur leikari á svið lokasenu Aðventu. Fylgdu ferðalangar í huganum Bensa til mannheima eftir mikla hrakninga en líkt og í sögunni voru ferðalokin góð og dagurinn eftirminnilegur.
17. október 2008
Frá Aðventuferð í nóvember 2007.
SÁLARNÆRING OG SEÐJANDI KRÆSINGAR
- fjölbreytt menningardagskrá fram að jólum
7. nóvember - Aðventa Gunnars - kvöldverður og leiksýning
Möguleikhúsið sýnir leikgerð Öldu Arnardóttur af hinni frægu skáldsögu Gunnars, Aðventu, í Végarði. Einn leikari. Pétur Eggerz, flytur söguna og bregður sér í hlutverk helstu persóna. Á undan leiksýningunni verður þjóðlegur kvöldverður á Skriðuklaustri. Kvöldverðurinn kostar kr. 3.490 og verður húsið opnað kl. 19. Miðaverð á leiksýninguna er kr. 1.900 (900 fyrir 16 ára og yngri) og hefst hún kl. 21. Kvöldverður og leiksýning saman kr. 4.990.
8. nóvember - Í fótspor Fjalla-Bensa - ferð á söguslóðir Aðventu
Gunnarsstofnun stendur öðru sinni fyrir dagsferð á jeppum á söguslóðir Aðventu á Mývatnsöræfum í samstarfi við Ferðafélög Fljótsdalshéraðs og Húsavíkur og Austurlands- og Húsavíkurdeildir 4x4, og með styrk frá Menningarráði Austurlands. Áð verður á sögustöðum, saga Gunnars rifjuð upp og frásagnir af Fjalla-Bensa. Með í för verða Pétur Eggerz leikari, sem mun lesa og flytja brot úr verkinu, og Arngrímur Geirsson í Álftagerði, sem gjörþekkir svæðið og sögur af svaðilförum Bensa. Endað verður í kjötsúpu í Möðrudal. Sætaframboð er takmarkað og áhugasömum er bent á að skrá sig hið fyrsta í síma 471-2990 eða á This email address is being protected from spambots. You need JavaScript enabled to view it.. Þátttökugjald er kr. 9.500 og er þá kjötsúpan innifalin. Skráningarfrestur er til fimmtudags 6. nóvember.
12. nóvember - Leshringur um Nótt og draum
Þriðja bindi Fjallkirkjunnar tekið til umfjöllunar. Allir velkomnir. Hefst kl. 20.00.
14. nóvember - Lomberkvöld á Klaustri
Lomber spilaður frá kl. 20.00 til miðnættis. Áhugasamir nýliðar boðnir sérstaklega velkomnir.
15. nóvember - Herragarðskvöldverður og kvöldvaka á Dögum myrkurs
Í tilefni af Dögum myrkurs býður Klausturkaffi til herragarðskvöldverðar þar sem töfraðar verða fram alls konar kræsingar. Að honum loknum stendur Gunnarsstofnun fyrir kvöldvöku með blandaðri dagskrá.
16. nóvember - Súkkulaðikökuhlaðborð á Degi íslenskrar tungu
Að venju verður Klausturkaffi með súkkulaðikökuhlaðborð á Dögum myrkurs. Í tilefni af Degi íslenskrar tungu verður Gunnarsstofnun með stutta dagskrá sama sunnudagssíðdegi sem verður nánar auglýst síðar.
27. nóvember - Rithöfundalestin rennir í hlað
Hin árvissa rithöfundalest kemur við á Klaustri og les úr jólabókunum. Heitt súkkulaði og jólakökur hjá Klausturkaffi.
30. nóvember - Grýlugleði og Grýlubrúður
Hefðbundin dagskrá um Grýlu og hyski hennar með gaulálfum og sagnaálfum. Sýning á Grýlubrúðum sem grunnskólabörn á Austurlandi hafa unnið í vetur. Jólakökuhlaðborð hjá Klausturkaffi.
4. og 5. des. - Jólaföstuhlaðborð hjá Klausturkaffi
Taktu þátt í að skapa nýja hefð og komdu á jólaföstuhlaðborð. Úrval grænmetis- og fiskrétta á kr. 3.890.
14. desember - Aðventuupplestur
Aðventa Gunnars Gunnarssonar lesin í heild sinni á skrifstofu skáldsins. Kyrrðarstund í amstri jólanna.
7. október 2008
Frá Aðventuferð í nóvember 2007.
Námskeið um Aðventu og ferð á söguslóðir
Endurmenntunarstofnun HÍ og Gunnarsstofnun standa fyrir námskeiði þar sem Jón Yngvi Jóhannsson, bókmenntafræðingur sem nú vinnur að ritun ævisögu Gunnars, mun ásamt gestakennurum veita nemendum innsýn í útbreiddustu sögu skáldsins: Aðventu. Kennt verður þrjú kvöld á tímabilinu 20. október til 3. nóvember og verður sent út í fjarfundi frá Reykjavík til fræðslumiðstöðva eins og Þekkingarnetsins á Egilsstöðum ef næg þátttaka fæst. Námskeiðsgjald er kr. 13.400. Gunnarsstofnun mun síðan eftir námskeiðið standa fyrir ferð á söguslóðir Aðventu á Mývatnsöræfum líkt og gert var á síðasta vetri í samstarfi við jeppamenn. Sú ferð verður auglýst nánar síðar. Nánari upplýsingar um námskeiðið og skráning á það er hjá Endurmenntun HÍ.
22. ágúst 2008
Fljótsdalsdagur Ormsteitis:
FLJÓTSMENN, MÚGSEFJUN OG ÞRISTARLEIKAR
Hinn árlegi Fljótsdalsdagur Ormsteitis verður sunnudaginn 24. ágúst. Hann hefst með gönguferð við Hrafnsgerði kl. 10.00 undir leiðsögn Helga Hallgrímssonar og fram að hádegi verður einnig þrautakeppni fyrir fjölskyldur í Víðivallaskógi. Í hádeginu er boðið upp á pylsugrill í veislurjóðri Víðivallaskógar og hádegisverðarhlaðborð er hjá Klausturkaffi. Klukkan 14.00 hefst síðan dagskrá á Skriðuklaustri með stórtónleikum. Þar munu hið fljótsdælska bítlaband Fljótsmenn stíga á stokk í tilefni 40 ára afmælis síns og hita upp fyrir hljómsveitina Múgsefjun sem gert hefur garðinn frægan í sumar með laginu "Þú ert svo lauslát". Að tónleikunum loknum verður fimleikadeild Hattar með sýningu og síðan taka við hinir óborganlegu Þristarleikar. Á þeim verður að venju keppt um Bessasteininn í steinatökum, pokahlaupi, fjárdrætti og rababarakasti. Sultukeppnin verður á sínum stað og keppt í tveimur flokkum, rababarasultum og öðrum sultum. Þá verður keppt um lengsta rababaralegginn. Gert er ráð fyrir að Þristarleikum verði lokið kl. 17.00 og þá verður guðsþjónusta við rústir klaustursins forna enda var 24. ágúst messudagur hinnar gömlu klausturkirkju. Sr. Davíð Tencer, prestur kaþólsku kirkjunnar á Kollaleiru, og sr. Lára G. Oddsdóttir sóknarprestur á Valþjófstað þjóna. Ormsteiti mun ljúka með þessari athöfn við klausturrústirnar.
Frítt er á alla viðburði í Fljótsdal en þeir sem standa að deginum eru Fljótsdalshreppur, Skriðuklaustur (Gunnarsstofnun), Klausturkaffi og Þristurinn.
5. ágúst 2008
Nýjar sýningar:
Furður Fljótsdals og Veiði II
Föstudaginn 2. ágúst voru opnaðar tvær nýjar sýningar á Skriðuklaustri. Í gallerí Klaustri sýnir nú Katerina Mistal, sænsk listakona sem dvaldi í Klaustrinu sumarið 2007. Sýning hennar kallast Jagt II eða Veiði II og í henni vinnu listakonan með samband manns og landslags. Fyrir augu ber m.a. hreindýraveiðimann, kínverska verkamenn við Kárahnjúkastíflu, litla tindáta og ungmenni úr Fljótsdal. Sýning Katerinu stendur til 29. ágúst.
Í stássstofunni var tekin niður sýningin Sögur í mynd og sett upp síðsumarssýningin Furður Fljótsdals. Á henni er leitast við að sýna og segja frá nokkrum náttúruvættum, sögustöðum eða þjóðsögum og fyrirbærum sem finnast innan Fljótsdals. Litið er við á Parthúsum, við Hengifoss, í helli Grýlu, hjá Lagarfljótsorminum, Hrafnkeli Freysgoða og á Skriðuklaustri. Hægt er að fara í teningaspil og læra um fleiri staði og sögur. Á sýningunni er jafnframt eftirlíking af Valþjófsstaðahurðinni sem Halldór Sigurðsson á Miðhúsum skar út og Héraðsbúar gáfu Kristjáni Eldjárn forseta Íslands þegar hann heimsótti Austurland 1971. Sýningin Furður Fljótsdals stendur fram í september.
21. júlí 2008
Gullhringur fannst við fornleifarannsókn
Fornleifafræðingarnir sem eru að störfum á Kirkjutúni við að grafa upp miðaldaklaustrið á Skriðu fundu í dag forláta gullhring í einni gröfinni sem verið er að rannsaka. Hringurinn er með blaðskrauti og trúlega frá síðmiðöldum.. Ekki liggur ljóst fyrir hvort hann er frá klausturtímanum (1493-1550) eða frá þeim tíma er kirkja að Skriðu var heimakirkja sýslumanna og annarra er bjuggu á Skriðuklaustri.
Innan við tíu gullhringir hafa fundist við fornleifarannsóknir hér á landi og því telst fundurinn til tíðinda. Kistan sem hringurinn fannst í var stór og vel varðveitt. Á kistulokinu var áletrun sem ekki hefur tekist að ráða í en væntanlega er það fangamark þeirrar sem í kistunni hvíldi. Sá hefur verið fyrirmenni því að gullhringir voru ekki almenningseign á miðöldum.
Gullhringurinn góði er nú kominn á sýningu þá sem er í Gunnarshúsi um klaustrið og rannsóknina. Þar geta gestir skoðað hann en einnig er leiðsögn um fornleifasvæðið alla daga.
1. júlí 2008
Gítartónleikar og sýning Anne Pesce
Næstkomandi föstudagskvöld, 4. júlí kl. 20.00, heldur Þórólfur Stefánsson gítarleikari tónleika á Skriðuklaustri. Á efnisskrá eru verk eftir bræðurna Sainz de la Maza og andalúsísk elegía eftir Mario Castelnuovo Tedesco.
Þórólfur býr og starfar í Svíþjóð og hefur komið fram sem einleikari og með hljómsveitum í Svíþjóð á Íslandi, Spáni og Norðurlöndunum. Hann hefur fengið ýmsa styrki og viðurkenningar, m.a frá Norræna menningarsjóðnum. Opið verður hjá Klausturkaffi fyrir tónleikana fyrir þá sem vilja fá sér í svanginn.
Laugardaginn 5. júlí kl. 14.00 verður opnuð sýningin Quel est mon nom? Hvað heiti ég? í gallerí Klaustri. Þar sýnir franska listakonan Anne Pesce verk sem hún hefur unnið í kjölfar dvalar í gestaíbúðinni Klaustrinu 2007 og 2004. Hún býr í Vence í Suður-Frakklandi og kennir við listaháskóla í Nice. Verk hennar hafa verið sýnd í víða í Frakklandi og Íslands seríur hennar hlotið góða dóma. Hún notar blandaða tækni við listsköpun sína en í gallerí Klaustri sýnir hún minni myndir unnar á pappír.
Laugardagskvöldið 12. júlí verður kvöldverður hjá Klausturkaffi kl. 19. Gestakokkur Guðveig Eyglóardóttir (Halastjörnunni). Eftir kvöldverð, kl. 21.00 verða síðan tónleikar með Bertu Ómarsdóttur söngur og S. Zaki Ramadhan gítar. Borðapantanir í síma 471-2992.
26. júní 2008
Stjórn Skriðuklaustursrannsókna ásamt ritstjórum greinasafnsins.
Greinasafn um Skriðuklaustur
Fyrstu eintökin af fyrsta bindi Fræðirita Gunnarsstofnunar voru afhent stjórn Skriðuklaustursrannsókna á Skriðuklaustri í dag, 25. júní. Greinasafnið ber heitið Skriðuklaustur - evrópskt miðaldaklaustur í Fljótsdal. Þrettán íslenskir fræðimenn skrifa í ritið og eru greinarnar flestar byggðar á erindum sem flutt voru á málþingi um Skriðuklaustur í nóvember 2006 og febrúar 2007. Umfjöllunarefnið er bakgrunnur og starfsemi klaustra á Íslandi með áherslu á Ágústínusarklaustrið sem starfrækt var á Skriðu í Fljótsdal frá 1493 til siðaskipta. Rýnt er í fornar heimildir og þær upplýsingar og minjar sem fornleifarannsókn á Skriðuklaustri hefur leitt í ljós.
Útgáfa þessa greinasafns er liður í verkefninu Íslensk miðaldaklaustur sem Gunnarsstofnun hefur unnið að síðustu ár með tilstyrk Kristnihátíðarsjóðs. Verkefnið snýst um að draga saman þekkingu og miðla sögu íslenskra miðaldaklaustra með aðstoð margmiðlunartækni. Greinarnar í riti þessu mynda grunninn fyrir gerð margmiðlunarefnis um Skriðuklaustur og klausturhald á Íslandi.
Greinahöfundar eru: Guðný Zoëga, Gunnar Bjarnason, Jón Ólafur Ísberg, Kristján Valur Ingólfsson, Margrét Gestsdóttir, Már Jónsson, Samson Bjarnar Harðarson, Skúli Björn Gunnarsson, Smári Ólason, Steinunn Kristjánsdóttir, Vilborg Auður Ísleifsdóttir, Þóra Kristjánsdóttir, Þórir Stephensen
Ritstjórar eru Hrafnkell Lárusson sagnfræðingur og Steinunn Kristjánsdóttir fornleifafræðingur. Kápuna hannaði Guðjón Bragi Sveinsson.
Hægt er að panta bókina frá Gunnarsstofnun í síma 471-2990 eða á netfanginu This email address is being protected from spambots. You need JavaScript enabled to view it.. Verðið er 3.500 kr. Hún verður einnig til sölu í helstu bókaverslunum.
10. júní 2008
Margs að njóta á Skriðuklaustri
Sumarið er svo sannarlega gengið í garð á Skriðuklaustri með fjölbreyttri starfsemi. Klausturkaffi býður upp á hádegis- og kaffihlaðborð alla daga með rjúkandi réttum. Fornleifafræðingar hafa tekið til við að grafa í klausturrústunum og veitt er leiðsögn um rannsóknarsvæðið. Í stássstofu stendur enn yfir sýning á verkum Elíasar B. Halldórssonar í samspili við texta Gyrðis Elíassonar, Sögur í mynd. Þá er í gallerí Klaustri skemmtileg ljósmyndasýning um ferðalag frönsku brúðunnar Litla.
Litli ferðaðist um Ísland árið 2004 ásamt ljósmyndaranum Séverine Thévenet. Fyrir Litla var ferðalagið mikil upplifun og eins konar endurfæðing en Litli er brúða sem fannst á háalofti í nágrenni Lyon í Frakklandi. Ljósmyndir Séverine Thévenet segja okkur frá ferðalagi Litla um Ísland. Sýningin er í samvinnu við Sendiráð Frakka á Íslandi.
19. maí 2008
Nýtt merki fyrir Skriðuklaustur og erindi um skjala- og handritasafn
Á fæðingardegi Gunnars skálds, sunnudaginn 18. maí, var kynnt nýtt merki fyrir Skriðuklaustur hannað af Zdenek Patak, grafískum hönnuði sem býr á Stöðvarfirði. Merkið er hugsað sem staðarmerki, einskonar regnhlíf yfir alla starfsemi á staðnum og verður framvegis notað á öllu kynningarefni fyrir staðinn.
Í kjölfar kynningar á merkinu sagði Örn Hrafnkelsson, forstöðumaður handritadeildar Landsbókasafns, frá samstarfsverkefni Gunnarsstofnunar og Lbs-Hbs er varðar varðveislu á gögnum Gunnars skálds.
17. maí 2008
Nýtt merki fyrir Skriðuklaustur
Á fæðingardegi Gunnars skálds, 18. maí kl. 15.00, verður kynnt nýtt merki fyrir Skriðuklaustur hannað af Zdenek Patak. Merkið er hugsað sem staðarmerki, einskonar regnhlíf yfir alla starfsemi á staðnum. Í kjölfar kynningar á merkinu mun Örn Hrafnkelsson, forstöðumaður handritadeildar Landsbókasafns, segja frá samstarfsverkefni Gunnarsstofnunar og Lbs-Hbs er varðar varðveislu á gögnum Gunnars skálds. Dagskráin er öllum opin meðan húsrúm leyfir.
16. maí 2008
Gestastofa Vatnajökulsþjóðgarðs á Skriðuklaustri
Þann 25. apríl sl. var tilkynnt um úrslit í arkitektasamkeppni vegna gestastofu Vatnajökulsþjóðgarðs sem reist verður á Skriðuklaustri. Alls bárust sex tillögur í keppnina og varð tillaga Arkís hlutskörpust. Í lýsingu sinni á hugmyndafræðinni að baki verðlaunatillögunni segja arkitektarnir eftirfarandi:
Vatnajökull og nágrenni geyma mörg aðalatriði sköpunarsögu Íslands og jarðarinnar undanfarnar ármilljónir: jarðeld, jökulís, vatn og vind. Við hönnun bygginganna er vísað til þessara frumafla og er útlit þeirra og notagildi því í sterkum tengslum við umhverfið. Form byggingarinnar við Skriðuklaustur er innblásið af eilífum sköpunarmætti jökulsins; hvernig hann ýmist brýtur sér leið í gegnum landið eða hopar og sverfur nýjar, síbreytilegar náttúruperlur í landslagið. Gestastofan sækir einnig hughrif til Gunnarshúss sem er skammt undan. Notuð eru byggingarefni frá staðnum þ.e. lerki og gras á þaki og hleðslur í lóð hlaðnar úr heimafengnu grjóti.
Byggingin myndar einsskonar x-laga form. Meginás byggingarinnar, sýningar- og fræðsluás - "Skriðjökullinn"&Mac226; rís upp frá berggrunninum til beggja handa og skapar umgjörð fyrir sýningarrými og bókasafn. "Berggrunnurinn", þjónustuásinn, liggur þvert á sýningarásinn og hýsir veitingasölu og snyrtingar auk starfsmannaaðstöðu. Í gegnum þessa ása liggur upplýsingabrautin sem endar í fyrirlestraraðstöðu utanhúss.
Hægt er að skoða tillögurnar nánar á heimasíðu Arkís. Gert er ráð fyrir að skóflustunga að byggingunni verði tekin komandi haust og gestastofan verði opnuð árið 2009.
Tillögurnar sex sem bárust í keppnina verða til sýnis á Skriðuklaustri fram í júní.
8. maí 2008
SÖGUR Í MYND - Námskeið í skapandi skrifum og grafíklist
Í tengslum við verkefnið SÖGUR Í MYND standa Gunnarsstofnun og Grafíksetrið fyrir tveimur námskeiðum, annars vegar í skapandi skrifum og hins vegar í grafíklist. Á báðum námskeiðum verður lögð áhersla á að vinna út frá Þjóðsögum Sigfúsar Sigfússonar og innblástur sóttur í skáldverk Gyrðis Elíassonar og grafíkverk Elíasar B. Halldórssonar.
Skapandi skrif á Skriðuklaustri
Leiðbeinendur: Skúli Björn Gunnarsson og Andri Snær Magnason
Kennt í þremur lotum, kl. 17-21, 23. maí, 26. maí og 9. júní. Kennsla fer fram með stuttum fyrirlestrum og verklegum æfingum við að skrifa smásögur og ljóð. Markmiðið er að nemendur hafi í lokin fullunnið a.m.k. eina smásögu og eitt ljóð.
Námskeiðsgjald: 9.500 kr. með kvöldverði. Hámarksfjöldi 6 manns. Nánari upplýsingar og skráning í síma 471-2990 eða í tölvupósti á This email address is being protected from spambots. You need JavaScript enabled to view it..
Grafíklist á Stöðvarfirði
Leiðbeinendur: Ríkharður Valtingojer og Sólrún Friðriksdóttir
Kennt á einni helgi, kl. 10-18, 14.-15. júní. Kennsla fer fram með stuttum fyrirlestrum og verklegum æfingum. Markmiðið er að nemendur hafi í lokin unnið nokkur grafík-verk með tréristu, dúkristu eða þurrnál.
Námskeiðsgjald: 15.000 kr. með efni.
Hámarksfjöldi 6 manns. Nánari upplýsingar og skráning í síma 475-8931/863-9080 eða í tölvupósti á This email address is being protected from spambots. You need JavaScript enabled to view it.
Skráningarfrestur á bæði námskeiðin er til 20. maí.
3. maí 2008
Frá opnun á Sögur í mynd. ljósm. Andrés Skúlason.
Sögur í mynd á Skriðuklaustri
Fimmtudaginn 1. maí voru opnaðar þrjár sýningar á Skriðuklaustri sem marka upphaf sumars og er nú opið alla daga kl. 12-17. Í gallerí Klaustri sýnir Elva Hreiðarsdóttir grafíkverk og stendur sú sýning til loka maí. Á sýningu um klaustrið að Skriðu og fornleifarannsóknina hefur verið komið fyrir munum sem tengjast trúarlífi og einnig er búið að gera 12 mínútna langa mynd um uppgröftinn sem sýnd er á staðnum. Aðalsýningin sem opnuð var þann 1. maí var Sögur í mynd, sýning á myndskreytingum Elíasar B. Halldórssonar við bækur Gyrðis Elíassonar. Á sýningunni eru 24 grafíkmyndir og tvö málverk sýnd í samspili við sögur Gyrðis. Sögur í mynd stendur til 27. júlí en tengist stærra verkefni undir sama heiti sem unnið er í samstarfi við Grafíksetrið á Stöðvarfirði með tilstyrk frá Menningarráði Austurlands. Þann 10. maí verður opnuð í Grafíksetrinu sýning á eldri grafíkverkum eftir Elías.
Nokkrar svipmyndir frá Sögur í mynd
Gyrðir Elíasson við heykvísl og gúmmískó. Ljósm. Andrés Skúlason.
Sigurlaugur Elíasson ásamt frænkum sínum. Ljósm. Andrés Skúlason.
28. apríl 2008
Sögur í mynd, franskt vor og fleiri sýningar
Þá er sumarið komið á Skriðuklaustri og frá og með 1. maí verður opið alla daga kl. 12-17. Fimmtudaginn 1. maí kl. 14 verður opnuð stór sýning á grafíkverkum Elíasar B. Halldórssonar í samspili við sögur Gyrðis Elíassonar í stássstofunni á Klaustri. Á sýningunni eru fyrst og fremst myndskreytingar Elíasar sem birst hafa í bókum Gyrðis. Sýningin er liður í verkefninu Sögur í mynd sem er samstarfsverkefni Gunnarsstofnunar og Grafíksetursins á Stöðvarfirði og nýtur styrks frá Menningarráði Austurlands. Þann 10. maí verður opnuð sýning á eldri grafíkmyndum Elíasar í Grafíksetrinu. Annar hluti verkefnisins snýst síðan um námskeið í skapandi skrifum og grafíkskreytingum út frá Þjóðsögum Sigfúsar Sigfússonar.
Á fimmtudaginn verða einnig opnaðar fleiri sýningar, m.a. á nýjum munum úr uppgreftrinum á klaustrinu og í Gallerí Klaustri verða sýnd verk eftir Elvu J. Th. Hreiðarsdóttur.
heldur tónleika. Kvöldverðurinn hefst kl. 19.00 en tónleikarnir hefjast kl. 20.30. Borðapantanir í kvöldverðinn eru í síma 471-2992 eða á This email address is being protected from spambots. You need JavaScript enabled to view it.
14. apríl 2008
Lomberslagurinn við Húnvetninga
Laugardaginn 12. apríl háðu Austfirðingar lomberslag við Húnvetning að Öngulsstöðum í Eyjafirði. Mættu Húnvetningar tvöfalt fjölmennari og spilað var á tíu borðum frá hádegi og fram á kvöld. Spiluð voru vel á annað þúsund spil og fóru leikar þannig að Austfirðingar töpuðu heldur minna í heildarsamtölu dagsins. Húnvetningar voru hins vegar með hærri plús ef að aðeins voru teknir með þeir sem náðu að halda sér yfir núllinu yfir daginn. Í lok dagsins lá því ekki alveg ljóst fyrir hvernig leikar hefðu farið þar sem liðsmunurinn skekkti alla útreikninga og gerði þá umdeildanlega. Sannmæltust menn um að jafnt hefði verið á með liðum.
Þetta var í þriðja sinn sem þessir tveir hópar mættust og mikið fjör að venju. Spilað var eftir húnvetnskum reglum fyrra hluta dagsins og austfirskum seinnipartinn. Áður en haldið var heim var sammælum bundist að halda áfram þessum árlega viðburði.
Nokkrar svipmyndir frá lomberslagnum á Öngulsstöðum.
2. apríl 2008
Lokahelgin Trjálífs og 700.is
Seinni sýningardagur á heimildamyndum 700.is á Skriðuklaustri verður á laugardaginn kl. 13-17. Aðgangur er ókeypis. Röð myndanna er þessi:
Þá verður Trjálíf, sýning Handverks og hönnunar, opin bæði laugardag og sunnudag kl. 13-17, en þetta er síðasta sýningarhelgi hennar. Aðgangur er ókeypis á sýninguna. Að sjálfsögðu verður kaffihlaðborð hjá Klausturkaffi báða dagana.
18. mars 2008
Trjálíf og Sjö orð Krists á krossinum
Sýningin Trjálíf verður opin kl. 13-17 á föstudaginn langa, laugardag og annan í páskum. Aðgangur ókeypis. Á föstudaginn langa kl. 14.000 verður klukkustundarlöng dagskrá helguð Hallgrími Péturssyni sálmaskáldi á vegum sóknarprestanna á Héraði undir yfirskriftinni Sjö orð Krists á krossinum.
Kaffihlaðborð verður hjá Klausturkaffi sömu daga.
15. mars 2008
TRJÁLÍF - sýning Handverks og hönnunar
Í dag, laugardaginn 15. mars kl. 14 verður opnuð á Skriðuklaustri sýningin TRJÁLÍF. Sýningin er samvinnuverkefni Handverks og hönnunar og Gunnarsstofnunar. Á sýningunni eru fólk og fjölbreytt dýr unnin úr tré. Sýnendur eru: Aðalheiður Eysteinsdóttir, Bjarni Þór Kristjánsson, Bragi Baldursson, Helgi Björnsson, Ragnhildur Magnúsdóttir, Reynir Sveinsson, Sigurbjörg Jónsdóttir og Sigurður K. Eiríksson. Sýningin mun standa fram til 6. apríl og verður opin sem hér segir:
Að sjálfsögðu er opið í kaffihlaðborð hjá Klausturkaffi á sama tíma og því tilvalið að bregða sér í bíltúr í Fljótsdalinn.
Fleiri myndir frá sýningunni:
6. mars 2008
Frá sýningunni Gunnar og Danmörk í Þjóðarbókhlöðu. Ljósm. Helgi Bragason.
Sýningaropnun og afhending á gögnum skáldsins
Miðvikudaginn 5. mars opnaði Þorgerður Katrín Gunnarsdóttir menntamálaráðherra sýninguna Gunnar Gunnarsson og Danmörk í Þjóðarbókhlöðu. Á sýningunni er fjallað um fyrstu 50 árin í lífi Gunnars og dregin út sex þau viðburðaríkustu í máli og myndum. Jafnframt eru sýnd handrit, bréf, bækur og ýmis önnur gögn úr fórum skáldsins.
Gunnar Björn Gunnarsson afhendir landsbókaverði dagbók
frá Klausturárunum sem kom nýverið í leitirnar. Ljósm. Helgi Bragason.
Við sama tækifæri afhenti fjölskylda skáldsins síðustu gögn Gunnars og undirritaði afhendarsamning vegna þeirra handrita, bréfa og skjala sem á síðustu þremur árum hafa verið flokkuð og skráð og telja nú 227 öskjur í handritadeild safnsins. Var það verkefni samstarf Gunnarsstofnunar og Landsbókasafn Íslands - Háskólabókasafns og naut stuðnings menntamálaráðherra.
Skúli Björn Gunnarson og Ingibjörg Steinunn Sverrisdóttir
undirrituðu samstarfssamning. Ljósm. Helgi Bragason.
Forstöðumaður Gunnarsstofnunar og landsbókavörður notuðu tækifærið og endurnýjuðu samstarfssamning á milli stofnana sem miðar að byggja upp gott heimildasafn um skáldið og bæta þannig aðgengi að gögnum er tilheyra eða tengjast Gunnari Gunnarssyni með skráningu og viðeigandi varðveislu. Í opnunarávarpi menntamálaráðherra kom fram að ráðherrann hefði ákveðið að styrkja þetta samstarf áfram með fjárframlagi næstu tvö árin.
3. mars 2008
Kápa á útgáfu Bjarts á Svartfugli árið 2007.
Svartfugl í nýrri þýðingu í Þýskalandi
Gunnarsstofnun, sem fer með höfundarrétt Gunnars Gunnarssonar, hefur gengið frá útgáfusamningi við Reclam forlagið í Þýskalandi um útgáfu á Svartfugli í nýrri heimsbókmenntaröð forlagsins. Sagan verður þýdd að nýju af Karl-Ludwig Wetzig sem meðal annars hefur þýtt á þýsku bækur Jóns Kalmans Stefánssonar, Hallgríms Helgasonar og Þorvaldar Þorsteinssonar, og mun koma út haustið 2009.
Reclam er eitt af þekktari bókaforlögum Þýskalands og hefur frá 1936 gefið reglulega út Aðventu Gunnars Gunnarssonar. Síðast kom Aðventa út 2006 hjá Reclam í vandaðri útgáfu með inngangi eftir Jón Kalman Stefánsson.
Svartfugl kom fyrst út á þýsku 1930, ári eftir að sagan kom út í Danmörku, en hefur ekki komið út í Þýskalandi síðan um miðja síðustu öld. Síðast var hún gefin út á erlendri tungu í hjá Arléa útgáfunni í Frakklandi 1992.
Sú bókaröð sem Svartfugl kemur út í hjá Reclam á næsta ári er ný og vönduð og skipar Gunnar Gunnarsson sér þar á bekk með Oscar Wilde, Gilgamesch, John Milton, Joseph Conrad, Dante, Gustave Flaubert og Charles Dickens, svo nokkrir séu nefndir.
Svartfugl kom síðast út á íslensku í kiljuformi hjá Bjarti árið 2007 og hefur sú útgáfa notið mikilla vinsælda. Gunnar sækir söguefnið í hin frægu Sjöundármorð og dregur upp skarpa mynd af íslensku samfélagi um aldamótin 1800 í magnaðri sögu sem er með hans bestu verkum.
3. mars 2008
Guðjón Daníelsson og Björn Magni Björnsson glaðbeittir við spilaborðið.
Góður lomberdagur
Ágæt mæting var á lomberdaginn á Skriðuklaustri sl. laugardag. Spilað var af krafti frá kl. 14 og fram yfir miðnætti líkt og venjan er. Spilamenn voru á ýmsum aldri og sá elsti kominn vel á tíræðisaldur. Kátt var á hjalla og þegar stig voru gerð upp í lok dags kom í ljós að flestir voru í mínus en Matthías Þorvaldsson, einn af yngri spilurunum stóð uppi með flest stig.
Sýning um Gunnar Gunnarsson í Þjóðarbókhlöðu
Miðvikudaginn 5. mars opnar Þorgerður Katrín Gunnarsdóttir menntamálaráðherra sýningu um Gunnar Gunnarsson og Danmörku í Þjóðarbókhlöðunni. Á sýningunni eru í máli og myndum rakin viðburðarík ár í lífi Gunnars frá fæðingu og þar til hann snýr aftur heim til Íslands 1939. Jafnframt eru sýnd handrit, bréf og ýmis gögn og munir úr fórum skáldsins. Sýningin stendur til 30. apríl.
25. febúar 2008
Lomberdagurinn 1. mars
Hinn árlegi lomberdagur á Skriðuklaustri verður laugardaginn 1. mars.
Spilamennskan hefst kl. 13.30 og er mælt með því að byrjendur mæti þá strax. Vanir spilamenn geta hins vegar bæst í hópinn hvenær sem er dagsins. Sama fyrirkomulag verður á deginum og vanalega, spilað af krafti og kæti milli mála langt fram á kvöld. Þátttökugjald er sem hér segir:
• Spadda (kaffi, kökuhlaðborð og kvöldverður) kr. 3.900
• Manilía (kvöldverður og kaffi) kr. 3.000
• Basti (kökuhlaðborð og kaffi) kr. 1.200.
Ekki er verra að láta vita um þátttöku á lomberdeginum í síma 471-2990.
20. febúar 2008
Konudagskaffi og erindi Anik See
Sunnudaginn 25. febrúar, á konudaginn, verður að venju konudagskaffi hjá Klausturkaffi og fróðlegt erindi í síðdeginu. Opið er frá kl. 14-17 og kl. 15.00 mun kanadíska skáldkonan Anik See, sem nú dvelur í gestaíbúðinni Klaustrinu, flytja erindi um verk sín. Hún hefur m.a. skrifað líflegar ferðabækur sem ekki hvað síst snúast um mat og hafa hlotið mikið lof. Hægt er að skoða verk hennar inni á amazon.com. Ókeypis er inn á fyrirlesturinn.
Lomber
Lomber verður spilaður á föstudagskvöldið, 22. febrúar og síðan er rétt að menn fari að búa sig undir hinn árlega lomberdag sem verður laugardaginn 1. mars.
Spilamennskan hefst kl. 13.30 og er mælt með því að byrjendur mæti þá strax. Vanir spilamenn geta hins vegar bæst í hópinn hvenær sem er dagsins. Sama fyrirkomulag verður á deginum og vanalega, spilað af krafti og kæti milli mála langt fram á kvöld. Þátttökugjald er sem hér segir:
• Spadda (kaffi, kökuhlaðborð og kvöldverður) kr. 3.900
• Manilía (kvöldverður og kaffi) kr. 3.000
• Basti (kökuhlaðborð og kaffi) kr. 1.200.
Ekki er verra að láta vita um þátttöku á lomberdeginum í síma 471-2990.
22. janúar 2008
Sjálfseignarstofnun formlega tekin til starfa
Gunnarsstofnun varð þann 1. janúar sl. formlega að sjálfseignarstofnun sem starfar samkvæmt staðfestri skipulagsskrá. Skipulagsskráin var undirrituð á fæðingardegi Gunnars skálds 18. maí á síðasta ári en ákveðið að breytingin tæki gildi um áramót.
Stofnaðilar að sjálfseignarstofnuninni eru menntamálaráðuneytið, Háskóli Íslands, Stofnun Árna Magnússonar í íslenskum fræðum, Rithöfundasamband Íslands og Þróunarfélag Austurlands. Þessir aðilar skipuðu sína fulltrúa í stjórn stofnunarinnar á síðasta ári og er stjórn Gunnarsstofnunar nú þannig skipuð:
Gunnar Björn Gunnarsson skipaður af menntamálaráðuneyti og kosinn formaður
Sigríður Sigmundsdóttir skipuð af Þróunarfélagi Austurlands og kosin varaformaður
Margrét Jónsdóttir skipuð af Háskóla Íslands
Vésteinn Ólason skipaður af Stofnun Árna Magnússonar í íslenskum fræðum
Andri Snær Magnason skipaður af Rithöfundasambandi Íslands
Varamenn eru í sömu röð:
Gunnar Martin Úlfsson
Enok Jóhannsson
Hjalti Hugason
Svanhildur Óskarsdóttir
Davíð Stefánsson
