Í samspili við náttúruna

Hafdís Sverrisdóttir sem rekur Paradís Pottery við Apavatn sýnir keramik og fleiri listmuni í gallerí Klaustri. Eitt af því sem getur að líta á sýningunni eru það sem hún kallar trjádiska. Þeir eru gerðir með sérstakri tækni sem hún hefur þróað og nær með henni að kalla fram árhringi af trjáskífum í leirdiskum. Bjartar afturgöngur kallar Hafdís kertastjaka sem eru meðal annars unnir úr gömlu gleri af lömpum frá fyrri tíð og leir úr smiðju hennar. Sýningin stendur í gallerí Klaustri frá 23. maí til 12. júní og er sölusýning.

Skammdegishefðir á netinu

Kominn er sá tími árs sem flestar hefðir tengjast. Fastir viðburðir á Skriðuklaustri í skammdeginu eru með öðru sniði þetta árið sökum farsóttarinnar. Rithöfundalestin rennir ekki í hlað en í staðinn geta áhugasamir bókaunnendur kynnt sér þá fjölbreyttu útgáfu sem tengist Austurlandi þetta árið á vef og youtube-rás Austurgluggans.  Og Grýlugleðin sem hefði átt að fylla Gunnarshús af ærslafullu ungviði á fyrsta sunnudegi í aðventu varð að netævintýri Dvalins sagnálfs og gaulálfanna sem hægt er að sækja á youtube-rás Skriðuklausturs. Um árabil hafa Gunnarsstofnun og Rithöfundasamband Íslands staðið fyrir upplestri á Aðventu Gunnars Gunnarssonar á Skriðuklaustri og Dyngjuvegi 8 einn sunnudag í desember. Að þessu sinni verður ekki hægt að bjóða fólki að koma og njóta sögunnar í híbýlum skáldsins. Þess í stað verður sendur út á netinu upplestur þjóðþekks leikara sunnudaginn 13. desember. Þeir sem vilja halda í hefðirnar geta því komið sér notalega fyrir heima við með heitt súkkulaði og slegist í för með Benedikt, Eitli og Leó þriðja sunnudag í aðventu. Við hvetjum áhugasama að fylgjast með á facebook-síðu Skriðuklausturs en þar verður viðburðurinn kynntur nánar í næstu viku. 

Skáldað í silfur

Sýning Önnu Guðlaugar Sigurðardóttur var opnuð í gallerí Klaustri 8. ágúst. Á sýningunni eru munir úr gulli og silfri en Anna Guðlaug er nýútskrifuð úr gull- og silfursmíði frá Tækniskólanum og með sveinspróf í gullsmíði. Hún er aðeins 22 ára gömul og ein af yngstu nemendum Tækniskólans til að ljúka námi í faginu. Anna Guðlaug hefur unnið síðustu ár í Gullkistunni með skólanum og kynnst þar íslensku þjóðbúningaskarti og fræðst mikið um íslenska þjóðbúninginn og víravirkið. Þar hefur hún smíðað og gert við þjóðbúningaskart og fengið áhuga á því. Í einum áfanga í skólanum voru smíðaðar myllur á þjóðbúning og í framhaldi af því datt henni í hug að gaman væri að koma sér upp eigin búning fyrir útskrift og smíða á hann skartið. Það varð svo að veruleika eftir áramótin, en þá fékk hún ömmu sína með sér á námskeið þar sem þær saumuðu hvor sinn 20. aldar upphlutinn og hún smíðaði svo borðana á upphlutinn sinn og stokkabelti við hann.

Sýningin átti að standa til 27. ágúst en var framlengd til 20. september.

COVID tilkynning 31. júlí

Vegna nýrra ráðstafana til eflingar sóttvarna tilkynnist að áfram verður opið daglega á Skriðuklaustri kl. 10-18, bæði til að skoða sýningar og njóta veitinga. Við beinum því til gesta okkar að hafa það í huga að til að tryggja 2 metra fjarlægð milli ótengdra einstaklinga og fjöldatakmörk hússins þurfum við öll að sýna skilning og þolinmæði því að ekki komast allir að í einu. Hægt er að panta borð hjá Klausturkaffi í síma 471-2992. Hádegiverður er frá kl. 11:30 - 14:00 og síðdegiskaffi frá kl. 15:00-17:00. Ef drepa þarf tímann utandyra á Skriðuklaustri er hægt að skoða minjar miðaldaklaustursins eða kíkja í völundarhúsið auk þess sem í Snæfellsstofu er skemmtileg sýning um náttúru Vatnajökulsþjóðgarðs. Sýnum tillitsemi, kurteisi og styðjum hvert annað. Við erum öll almannavarnir!

Drekkingarhylur - myndbandsverk

Ný sýning hefur verið opnuð í gallerí Klaustri. Bandaríska listakonan Joan Perlman sýnir myndbandsverkið Drowning Pool - Drekkingarhylur. Hún dvaldi í gestaíbúðinni á Skriðuklaustri árið 2013 og hefur safnað myndefni á Íslandi í mörg ár. Í þessu verki eru m.a. teknir fyrir aftökustaðir og bregður fyrir stöðum eins og Drekkingarhyl á Þingvöllum og galdrabrennustað í Trékyllisvík. Tónlist við myndbandsverkið er eftir írska tónskáldið Lindu Buckley. Sýningin stendur til 24. júlí.

Hafðu samband

  • This email address is being protected from spambots. You need JavaScript enabled to view it.

Komdu í heimsókn

Fylgdu okkur