Þú ert hér: Home Fréttir 2011
  • Increase font size
  • Default font size
  • Decrease font size
Leit

Skriðuklaustur

Icelandic(IS)Deutsch (DE-CH-AT)French (Fr)English (United Kingdom)

Fréttir 2011

Jólakveðja frá Klaustri

Prenta út
Gunnarsstofnun og Klausturkaffi senda gestum sínum og velunnurum bestu óskir um gleðileg jól og farsæld á nýju ári.
 

Nýjar bækur frá Skriðuklaustri

Prenta út
Nýjar bækur frá SkriðuklaustriÞrjár nýjar bækur eru komnar út á Skriðuklaustri. Klausturkaffi hefur gefið út Uppáhaldsuppskriftir Elísabetar í handhægu spjaldaformi bæði á íslensku og ensku. Hjá Gunnarsstofnun er komin út Litabók um Grýlu með verðlaunateikningum austfirskra grunnskólabarna og gömlum kvæðabrotum. Fyrir þá sem vilja enn meira af Grýlu eru komin út Austfirsk Grýlukvæði í ritröðinni Austfirsk safnrit. Þessar bækur er hægt að panta frá Skriðuklaustri en þær eru einnig seldar Húsi handanna á Egilsstöðum.
 

100 ár frá útgáfu Digte

Prenta út

Gunnar um 1913Í dag eru liðin 100 ár frá því fyrsta bók Gunnars Gunnarssonar kom út í Danmörku. Það var ljóðasafnið Digte sem í eru 19 kvæði og kom út hjá V. Pios Boghandel á kostnað Gunnars sjálfs. Landsbókasafn Íslands - Háskólabókasafn og Gunnarsstofnun standa fyrir málstofu um ljóðskáldið Gunnar í Þjóðarbókhlöðu í tilefni þessa aldarafmæli. Frummælendur verða: Jón Yngvi Jóhannsson, bókmenntafræðingur og höfundur ævisögu Gunnars, Sveinn Yngvi Egilsson, prófessor við Háskóla Íslands og Skúli Björn Gunnarsson, forstöðumaður Gunnarsstofnunar. Málstofan hefst kl. 16 í dag 1. des. í fyrirlestrasal Þjóðarbókhlöðu. Aðgangur er ókeypis og allir velkomnir. Til sýnis verða bæði handrit og bækur sem tengjast ljóðagerð Gunnars. Landsbókasafnið, Gunnarsstofnun og erfingjar skáldins hafa af þessu tilefni gert ljóðasafnið Digte aðgengilegt á vefnum  baekur.is.

 

Rithöfundar og Grýlugleði um helgina

Prenta út

Nýja litabókinÁrviss rithöfundalest fer um Austurland um helgina 26. og 27. nóvember. Á ferð verða fjórir höfundar frá Forlaginu með nýjustu verk sín. Hallgrímur Helgason segir frá Konunni við 1000 gráður, Jón Yngvi Jóhannsson les úr ævisögu Gunnars Gunnarssonar sem heitir Landnám, Ragna Sigurðardóttir fræðir áheyrendur um sögu sína um Bónusstelpuna og Vigdís Grímsdóttir heldur á vit töfranna og les úr skáldsögunni Trúir þú á töfra? Lesið verður á Skriðuklaustri kl. 14.00 laugardaginn 26. nóv. Aðgangur 1000 kr. og 500 fyrir eldri borgara. Kaffi og smákökur innifaldar.



Hin árvissa Grýlugleði Gunnarsstofnunar á Skriðuklaustri verður haldin sunnudaginn 27. nóvember, á fyrsta sunnudegi í aðventu, kl. 14.00. Að venju munu gaulálfar og sagnálfar ráða ríkjum á skemmtuninni og fræða gesti um ægivald og ógnir Grýlu og hyskis hennar. Hjónakornin halda sig vonandi heima í Brandsöxlinni á meðan á gleðinni stendur. Kynnt verður glóðvolg útgáfa litabókar um Grýlu með kvæðabrotum austfirskra skálda fyrri alda og verðlaunateikningum austfirskra grunnskólabarna í 6. og 7. bekk. Allir velkomnir og ókeypis inn. Jólakökuhlaðborð hjá Klausturkaffi eftir skemmtun.

 

Landnám - ævisaga Gunnars komin út

Prenta út
Kápur hinna nýju bókaÚt er komin hjá Máli og menningu ævisaga Gunnars Gunnarssonar eftir Jón Yngva Jóhannsson. Heiti bókarinnar er Landnám. Jón Yngvi hefur unnið að þessu verki í mörg ár og sökkt sér í heimildir um skáldið, m.a. dagbækur og fleiri gögn úr einkaskjalasafni Gunnars. Í ævisögunni kemur því eitt og annað nýtt fram auk þess sem umfjöllun um flest skáldverk Gunnars er fléttað lipurlega inn í frásögnina. Fjallkirkjan í þýðingu Halldórs Laxness og með teikningum Gunnars yngri er einnig komin út hjá Forlaginu í seríunni Íslensk klassík, en hún hefur verið ófáanleg um skeið.
 

Aðventa - ferðalangar á Fjöllum

Prenta út
Sæluhúsið við Jökulsá á FjöllumOpið verður um helgar kl. 13-17  á Dögum myrkurs á Skriðuklaustri og boðið upp á sýningar og súkkulaðikökur. Laugardaginn 5. nóv. kl. 14 verða opnaðar tvær ljósmyndasýningar, Aðventa á Fjöllum og Ferðalangar á Fjöllum. Á þeim getur að líta svarthvítar vetrarmyndir Sigurjóns Péturssonar og Þóru Hrannar Njálsdóttur af söguslóðum Aðventu á Mývatnsöræfum og myndir af áritunum þeirra ferðalangar sem hafa kvittað fyrir komu sína í Sæluhúsið við Jökulsá á timburþil þess einstaka steinhúss síðustu 120 árin. Sýningarnar eru styrktar af Menningarráði Austurlands og Þjóðminjasafni Íslands en myndir þeirra Sigurjóns og Þóru Hrannar verða sýndar í Þjóðminjasafninu á næsta ári. [sjá nánar um sýningarnar]
 

Vikivaki kominn út í Þýskalandi

Prenta út

Gunnar Björn Gunnarsson stjórnarformaður Gunnarsstofnunar með Jörg Sundermeier eiganda Verbrecher verlagVikivaki kom í gær út hjá þýska forlaginu Verbrecher verlag í Berlín. Útgáfan var kynnt á bókamessunni í Frankfurt sem nú stendur yfir en þar skipar Ísland heiðurssess. Vikivaki kom fyrst út í Danmörku 1932 og 1934 í Þýskalandi. Á þeim tíma var sögu Gunnars Gunnarssonar um Jaka Sonarson tekið misjafnlega af gagnrýnendum enda um að ræða framúrstefnulegt verk í anda fantasíu. Gaman verður að sjá hvort viðhorf gagnrýnenda á 21. öldinni er annað. Karl-Ludwig Wetzig endurskoðaði þýðingu Helmut de Boor frá 1934. (heimasíða Verbrecher verlag)

 

Haustlokun á Skriðuklaustri

Prenta út
Haustlitir á KlaustriLok september nálgast og þar með er komið að haustlokun á Skriðuklaustri. Ekki verður opið um næstu helgi, þ.e. 1. og 2. október né aðrar helgar í október. Hópar geta þó alltaf haft samband ef þeir hafa áhuga á að koma í heimsókn og njóta sýningar og eða veitinga. Næstu viðburðir eru áætlaðir þegar Dagar myrkurs ganga í garð í nóvember og í kjölfar þess má búast við föstum viðburðum eins og rithöfundalest, Grýlugleði og Aðventulestri að ógleymdum jólahlaðborðum hjá Klausturkaffi. Að sjálfsögðu verður síðan spilaður lomber af og til.
 

Frágangur klausturrústa

Prenta út
Klausturrústir haustið 2011Undanfarnar tvær vikur hafa sjálfboðaliðar frá SEEDS unnið að frágangi á fornleifasvæðinu á Skriðuklaustri. Uppgreftri rústanna lauk í ágúst eftir tíu ára rannsókn og nú er búið að ganga þannig frá yfirborði svæðisins að ganga má um grunnform bygginganna frá 15. og 16. öld. Stærð bygginganna er umtalsverð, sem kemur glögglega í ljós við þessa einföldu endurgerð, og ljóst að hluti þeirra hefur verið á tveimur hæðum. Á næstu mánuðum verður unnin verndaráætlun fyrir svæðið í samstarfi við Fornleifavernd ríkisins og vonir standa til að næsta sumar, þegar 500 ár verða liðin frá vígslu klausturkirkjunnar, verði frágangi svæðisins lokið að fullu með tilheyrandi fræðsluskiltum og góðu aðgengi.
 

Landslagsmyndir í gallerí Klaustri

Prenta út
Sýning Skarphéðins Þráinssonar, Heimþrá, var opnuð í gallerí Klaustri sl. föstudag. Skarphéðinn sýnir þar landslagsmyndir teknar á heimaslóðum á Austurlandi, s.s. af Dyrfjöllum og Hengifossi. Sýningin stendur til 2. október og er opin á opnunartíma Gunnarshúss. Hægt er að sjá fleiri myndir eftir Skarphéðinn á heimasíðu hans  www.flickr.com/skarpi.
 

Fljótsdalsdagur næsta sunnudag

Prenta út
Æsispennandi pokahlaup á FljótsdalsdegiHéraðshátíðin Ormsteiti er hafin og næsta sunnudag lýkur henni með hinum árlega Fljótsdalsdegi. Gengið verður með Bessastaðaárgili kl. 10 og í Snæfellsstofu verður ratleikur fyrir börnin. Opið hús hjá Landsvirkjun í Végarði. Klausturkaffi verður að sjálfsögðu með bæði hádegis- og kaffihlaðborð en formleg dagskrá á Skriðuklaustri hefst kl. 13.30. Pétur Ben og Eberg, sönghópurinn Voces Thules  sem og valinkunnir heimamenn sem flytja lögin hans Tóta munu stíga á stökk á stéttinni við Gunnarshús með tónlistaratriði. Að tónleikum loknum hefjast klassískir Þristarleikar með steinatökum, rababaraspjótkasti, pokahlaupi og fjárdrætti. Einnig verður sultukeppni og dæmt um lengsta rababaralegginn að venju. Dagskránni lýkur síðan um 16.30 með guðsþjónustu við rústir Skriðuklausturs með þátttöku Voces Thules.
 

Örvaroddur í klausturrústum

Prenta út
Örvaroddur frá miðöldumFornleifafræðingar sem vinna við uppgröft á rústum hins forna Skriðuklausturs fundu á dögunum örvarodd frá 16. öld. Oddurinn er úr kopar og af klassískri gerð fyrir lásboga. Sjaldgæft er að slíkir örvaroddar finnist hér á landi enda voru slík vopn aðeins til á biskupssstólum og hjá höfðingjum. Vitað er að sveinar biskups voru vopnaðir þegar biskup vísiteraði sóknir landsins. Dr. Steinunn Kristjánsdóttir sem stýrir rannsókninni á Skriðuklaustri, telur líklegast af örvaroddurinn sé frá biskupssveinum kominn. Örvaroddurinn verður til sýnis á Skriðuklaustri næstu vikur. Hér má einnig sjá frétt RUV um fundinn.
 

Svar við bréfi Helgu

Prenta út
Myndskreyting úr Svar við bréfi HelguOpnuð hefur verið í gallerí Klaustri sýningin Svar við bréfi Helgu og fleiri myndir. Á henni sýnir Kjartan Hallur Grétarsson pennateikningar úr bók Bergsveins Birgissonar sem kom út 2011 og fleiri myndir frá fyrri árum. Sýningin er opin alla daga kl. 10-18 og stendur til 24. ágúst. Sjá nánar um Kjartan Hall á  www.myspace.com/kjartanhallur
 

Skósóli frá miðöldum

Prenta út
dr. Steinunn Kristjánsdóttir með skósólann. Ljósm. SBGUppgröftur sumarsins á klausturrústum á Skriðuklaustri er nú hálfnaður þetta sumarið. Búið er að opna nokkur ný svæði og útlit fyrir að markmiðinu um að ljúka vettvangsrannsókn í sumar verði náð. Grafið verður til 20. ágúst. Meðal þess sem fundist hefur á síðustu dögum er hluti af leðurskósóla frá miðöldum. Leiðsögn er um fornleifasvæðið alla daga eftir hádegi og hægt að ganga um þann hluta klausturminjanna sem búið er að rannsaka og ganga frá.
 

Sýning á The Night Cap

Prenta út
Föstudaginn 1. júlí var opnuð í gallerí Klaustri sýning á myndinni, The Night Cap, eftir Guðjón Braga Stefánsson og Eddu Rós Jónsdóttur. Myndin er byggð á þjóðsögunni Draugshúfan og var að hluta unnin sem sameiginlegt lokaverkefni listamannanna við Danmarks Designskole. Hún er gerð með blandaðri tækni þar sem notaðar eru teikningar, tölvugrafík, ljósmyndir og myndbandsklippur til að skapa heim verksins. Í grunninn er byggt á hefðbundinni klippibrúðutækni en allt unnið stafrænt. Sýningin á The Night Cap verður opin í gallerí Klaustri til 27. júlí alla daga kl. 10-18.
 

Áætlanaferðir í Fljótsdalinn

Prenta út
Tímaáætlun fyrir ferðirÍ dag hófust áætlanaferðir milli Egilsstaða og Végarðs í Fljótsdal. Farnar verða þrjár ferðir á dag næstu 5 vikurnar. Farið er frá Upplýsingamiðstöðinni á Egilsstöðum og stoppað á Hallormsstað, við Hengifoss, Skriðuklaustur og Végarð. Tanni Travel sér um aksturinn en ferðirnar eru samstarfsverkefni ferðaþjónustuaðila á Hallormsstað og í Fljótsdal sem einnig hafa gefið út bækling undir yfirskriftinni: Njóttu lífsins við Lagarfljót.
 

Uppgröftur hafinn

Prenta út
Fornleifafræðingar að störfum í klausturrústumFornleifafræðingarnir eru mættir á svæðið og uppgröftur sumarsins hafinn undir stjórn dr. Steinunnar Kristjánsdóttur. Þetta er tíunda sumarið sem grafið er í rústum hins forna Skriðuklausturs. Ætlunin er að ljúka uppgreftri klausturrústanna í sumar og verður um 15 manna teymi fornleifafræðinga að störfum til 20 ágúst. Leiðsögn er um fornleifasvæðið alla daga eftir hádegi.
 

Sýning Sveinbjargar opnuð

Prenta út

Sveinbjörg í Gallerí Klaustri.

Föstudaginn 3. júní var opnuð í gallerí Klaustri sýning Sveinbjargar Hallgrímsdóttur, listakonu á Akureyri, á myndskreytingum við norska sögu um Hrafna-Flóka. Útgáfa bókarinnar var samvinnuverkefni milli sveitarfélagsins Sveio á vesturströnd Noregs, norska sendiráðsins á Íslandi og fleiri aðila. Skáldkonan Sylvien Vatle var fengin til að skrifa sögu um þennan frækna víking og Sveinbjörg var valin til að myndskreyta verkið sem kom út í Noregi haustið 2010 og er nýkomin út á Íslandi hjá bókaútgáfunni Hólum. Á sýningunni í gallerí Klaustri eru 12 grafíkverk. Hún stendur til 29. júní og er opin alla daga kl. 10-18.

 

Hrafna-Flóki - grafíksýning

Prenta út
Sveinbjörg Hallgrímsdóttir í vinnustofu sinni. Fimmtudaginn 2. júní verður opnuð í gallerí Klaustri sýning á grafíkverkum Sveinbjargar Hallgrímsdóttur sem hún vann fyrir norska skáldsögu um Hrafna-Flóka. Bókin kom nýverið út á íslensku hjá Bókaútgáfunni Hólum. Sveinbjörg býr og starfar á Akureyri og rekur þar vinnustofu og gallerí undir nafninu Svartfugl. Sýning verður opnuð kl. 14 á uppstigningardag og eru allir velkomnir. Hún stendur til 29. júní.
 

Heimasíða og sýningar

Prenta út

Kjólföt Gunnars í nýjum sýningarskápÍ dag, á fæðingardegi Gunnars 18. maí, opnar Gunnarsstofnun nýjan og endurbættan vef. Hér er að finna margvíslegar upplýsingar um sögu Skriðuklaustur, líf og verk Gunnars Gunnarssonar og þá starfsemi og þjónustu sem rekin er á Skriðuklaustri í dag. Síðan er ekki alveg fullkláruð og biðjumst við velvirðingar á því ef að menn lenda í vandræðum. Stefnt er að því að hún verði fullbúin 1. júní.

Sumarsýning Skriðuklausturs um Gunnar skáld er einnig komin upp í stássstofu og búið að endurnýja fastasýningu í skrifstofu og svefnherbergi skáldsins. Jafnframt eru komnir nýir munir á fornleifasýningu í Franziscuherbergi sem veita innsýn í sjúkdómsgreiningar á beinum þeirra einstaklinga sem grafnir hafa verið upp í fornleifarannsókninni.

 

Austfirðingar lögðu Húnvetninga í lomberslag

Prenta út

Mynd frá lomberslagnum í Sveinbjarnargerði

Húnvetninga og Austfirðingar mættust í sínum árlega lomberslag í Sveinbjarnargerði í Eyjafirði sl. laugardag. Jafnt var í liðum, 22 að austan og vestan. Spilað var á ellefu borðum frá morgni til kvölds og alls gefið í 1716 spil. Þegar upp var staðið urðu úrslit þau að Austfirðingar voru með 434 mínusstig á móti 1254 mínusstigum Húnvetninga. Austfirðingar höfðu því sigur í þetta sinn sem var fimmta skiptið sem lomberspilarar úr þessum tveimur landshlutum reyna með sér. Mikil leikgleði ríkti í Sveinbjarnargerði þennan dag og var bundist fastmælum að mætast þar aftur að ári til að spila þetta 600 ára gamla spil sem var á öldum áður vinsælt fjárhættuspil um alla Evrópu.

Hér má finna myndir frá Lomberslagnum.

 

Harðangur og Skriðuklaustur

Prenta út
katy

Sunnudaginn 17. apríl verður opnuð í stássstofu Gunnarshúss hannyrðasýningin Harðangur og Skriðuklaustur. Það er textíllistakonan Katrín Jóhanesdóttir - Katý, sem sýnir. Á sýningunni má sjá ýmsar hannyrðir sem Katý hefur dundað sér við á síðkvöldum í Hallormsstaðaskógi og á námsárunum í Danmörku. Það sem fyrir augu ber eru m.a. hin ýmsu útsaumsspor, hekl, orkering, vefnaður, harðangurssaumur,  hand- og vélprjón og lítið eitt af hinu og þessu. Sýningin verður opin um páskana og fram í miðjan maí.

Myndir frá sýningunni má finna hér.

 

Upplýsingar

  • Opið

  • Hvar?

  • Verð

Júní-ágúst: Opið daglega kl. 10-18

Maí og sept: Opið daglega kl. 11-17

Apríl: Opið daglega kl. 12-16

1.-11. október: Opið daglega kl. 12-16

Nóv. - mars er opnunartími óreglulegur. Leitið upplýsinga.

Skriðuklaustur er í Fljótsdal fyrir botni Lagarfljóts. Kort

39 km frá Egilsstöðum

11 km frá Hallormsstað

5 km frá Hengifossi.

Á Skriðuklaustri er einnig Snæfellsstofa Vatnajökulsþjóðgarðs.

Fullorðnir (safn & leiðsögn) 1100 kr.
Börn 16 ára og yngri í fylgd með fullorðnum 0 kr.
Námsmenn 750 kr.
Eldri borgarar/Öryrkjar 550 kr.
Hópar (20+ manns) 900 kr.
Leiðsögn fornleifasvæði hópar (10>)
Fullorðnir 600 kr.
Börn 16 ára og yngri í fylgd með fullorðnum 0 kr.

 

 

Quotes

...og blóðborið lífið
endurfæðist æ ofan í æ,
sprettur ungt og eilífferskt
upp úr berri klöppinni
- á hverju einasta vori.

Svartfugl 1929


Á döfinni

Engir viðburðir á næstunni