Valdimar ©spessi

Valdimar á Fljótsdalsdegi

Hinn árlegi Fljótsdalsdagur er sunnudaginn 24. ágúst (sjá heildardagskrá á ormsteiti.is) Á Skriðuklaustri hefjast leikar kl. 11 með ratleik fyrir fjölskylduna. Dagskrá við Gunnarshús byrjar kl. 13.30 með tónleikum með hljómsveitinni VALDIMAR. Síðan taka við hefðbundnir Þristarleikar þar sem keppt er í steinatökum, sekkjahlaupi, fjárdrætti og rababaraspjótkasti ásamt því að dæmt verður um hver kemur með lengsta rababarann. Kl. 16.30 er svo guðsþjónusta beggja siða á rústum klausturkirkjunnar á minjasvæðinu. Að sjálfsögðu er hádegis- og kaffihlaðborð hjá Klausturkaffi og opið hús að skoða sýningar.

Bróderaðir hnyklar Auðar Bergsteinsdóttur

Bróderaðir hnyklar

Í gallerí Klaustri stendur nú yfir sýning Auðar Bergsteinsdóttur á bróderuðum hnyklum. Auður er fædd á Bessastöðum í Fljótsdal en hefur lengst af búið í Reykjavík. Hnykla sína býr hún til úr ýmsum efnum en saumar út í þá með ull, hörþræði og ýmsu öðru garni. Hnyklarnir eru af ýmsum stærðum og munstrin sækir Auður í íslenskt handverk og náttúru. Sýningin eru opin gallerí Klaustri alla daga til 7. september.

Ólöf Birna Blöndal

Í grjótinu - kolateikningar

Opnuð hefur verið sýning á teikningum eftir Ólöfu Birnu Blöndal í gallerí Klaustri. Sýningin ber heitið „Í grjótinu“ sem vísar til þess að um er að ræða tólf kolateikningar af grjóti, stuðlabergi, fjöllum og steinamyndunum. Ólöf Birna sýndi síðast í gallerí Klaustri árið 2001 en hefur síðan þá tekið þátt í fjölda samsýninga og haldið einkasýningar víða. Síðast sýndi hún í Sal íslenskrar grafíkur í Reykjavík á vordögum 2014. Sýningin stendur til 13. ágúst og er opin alla daga kl. 10-18.

Arni Haraldsson

Litbrigði Fljótsins í gallerí Klaustri

Kanadísk-íslenski ljósmyndarinn Arni Haraldsson hefur opnað ljósmyndasýningu í gallerí Klaustri. Hún ber heitið Litbrigði Fljótsins og á henni eru 12 ljósmyndir teknar af Lagarfljóti árið 2001 þegar Arni dvaldi í gestaíbúðinni Klaustrinu. Myndirnar eru teknar við ýmis birtuskilyrði, ekki síst á björtum sumarnóttum og gefa nýja sýn á Fljótið. Arni er nú kominn aftur í Klaustrið til að taka nýjar myndir af Lagarfljótinu. Arni Haraldsson kennir ljósmyndun við Emily Carr listaháskólann í Vancouver og hefur sýnt verk sín víða um heim og skrifað mikið um listir.

Jón S. Einarsson afhjúpar skilti við Gunnarshús. Við hlið hans er Margrét dóttir hans.

Skilti afhjúpað við Gunnarshús

Afmælishátíðin 22. júní tókst vel á Skriðuklaustri. Viðstaddir nutu flautuleiks Áshildar Haraldsdóttur og urðu vitni að því þegar Jón S. Einarsson, einn fárra sem enn lifa af þeim sem tóku þátt í að byggja Gunnarshús 1939, afhjúpaði upplýsingaskilti um húsið. Þá kom Gunnar Björn Gunnarsson, barnabarnabarn skáldsins, færandi hendi með skrifborðsstól skáldsins sem var nú að nýju sameinaður gamla skrifborðinu á skrifstofu Gunnars. Við þetta tækifæri var síðan opnuð sölubúð með ýmsum varningi tengdum staðnum og skáldsins, m.a. ónotuðum frumútgáfum á nokkrum verkum Gunnars. Þeir sem heimsækja Gunnarshús í sumar geta síðan tekið þátt í myndasamkeppni á Facebook síðu staðarins.

Hafðu samband

  • This email address is being protected from spambots. You need JavaScript enabled to view it.

Komdu í heimsókn

Fylgdu okkur