Saga Borgarættarinnar - frumsýnd að nýju

Kvikmyndin Saga Borgarættarinnar markar upphaf kvikmyndagerðar á Íslandi. Myndin var gerð af Nordisk Film eftir samnefndri skáldsögu Gunnars Gunnarssonar sem færði honum frægð og frama þegar hún kom út í Danmörku á árunum 1912-1914. Myndin var að stærstum hluta tekin upp á Íslandi haustið 1919 en frumsýnd ári síðar og telst til stórmynda norrænnar kvikmyndasögu á tíma þöglu myndanna.

Saga Borgarættarinnar vakti gríðarlega athygli, ekki síst vegna íslenska landslagsins og var sýnd í allt að fimmtán löndum þegar hún kom út. Hérlendis var hún frumsýnd snemma árs 1921 og hefur allar götur síðan verið hjartfólgin Íslendingum.

Í tilefni 100 ára afmælis myndarinnar hefur myndin verið endurgerð á stafrænu formi í háskerpu og fengið sína eigin frumsömdu tónlist frá hendi Þórðar Magnússonar tónskálds sem tekin var upp hjá Sinfóníuhljómsveit Norðurlands.

Myndin verður frumsýnd samtímis 3. október kl. 15, í Bíó Paradís í Reykjavík, Menningarhúsinu Hofi á Akureyri og Herðubíói á Seyðisfirði í samstarfi við Kvikmyndasafn Íslands, Gunnarsstofnun og Menningarfélag Akureyrar.

Hefð og endurnýjun - sýning og stefnumót við listamann

Dagana 16. - 19. september geta áhugasamir átt stefnumót við norsku textíllistakonuna Ingrid Larssen sem dvelur um þessar mundir í gestaíbúðinni á Skriðuklaustri. Hún hefur sett upp sýninguna Hefð og endurnýjun í gallerí Klaustri og mun sitja við sauma og vera til viðtals alla fjóra dagana á milli kl. 14-16. Ingrid kemur frá Vesterålen í Norður-Noregi og hefur síðustu 20 ár hafið aftur til vegs og virðingar gamlar saumahefðir eins og vöfflusaum. Hún litar sjálf sín efni með hráefni úr plöntu- og dýraríkinu. Á sýningunni má t.d. sjá silki litað með ígulkerjum, lúpínu og rabarbararót. Opið er á Skriðuklaustri alla daga kl. 12-17.

Konur í mynd

Kristín Rut Eyjólfsdóttir opnaði sýninguna Konur í mynd í gallerí Klaustri laugardaginn 31. júlí. Á sýningunni eru þrettán myndir sem hún hefur unnið síðustu misserin. Kristín er þekkt fyrir að fara sínar eigin leiðir í myndsköpun og hefur haldið nokkrar einkasýningar, m.a. á Skriðuklaustri 2013. Sýningin er sölusýning og hún er opin alla daga kl. 10-18 en lýkur 27. ágúst.

Heimsókn í Skriðuklaustur - keramiksýning

Sýningin Heimsókn í Skriðuklaustur var opnuð í gallerí Klaustri laugardaginn 10. júlí. Á henni sýnir Auður Inga Ingvarsdóttir keramikverk, bæði nytjahluti og skúlptúra. Auður Inga sækir innblástur í form í náttúrunni og eru fuglar henni hugstæðir eins og sjá má á skúlptúrum hennar. Hún hefur tileinkað sér gamlar brennsluaðferðir eins og raku og holubrennslu og eru flest verkin á sýningunni rakubrennd. Sýningin er sölusýning og stendur til 30. júlí. Hún er opin alla daga kl. 10-18 eins og safnið.

Til móts við nýtt upphaf

Náttúruljósmyndarinn Gunnar Freyr Gunnarsson opnaði sýninguna Til móts við nýtt upphaf í gallerí Klaustri á Skriðuklaustri sunnudaginn 13. júní. Á sýningunni eru ljósmyndir teknar víða um land en nokkrar sýna nærtæk form og landslag af Austurlandi. Sýningin fjallar um þróun, um breytingu og flæði sem marka umskipti í hugmyndafræði nútímans – sýnir heim sem fer frá því að vera heltekinn af heimsfaraldri en stefnir til nýrra tímamóta.

Gunnar er fæddur og uppalinn í Danmörku en flutti til Íslands árið 2015 með þann draum að gera náttúruljósmyndun að atvinnu. Hann stundaði nám við Ljósmyndaskólann í Reykjavík árið 2016 og hefur síðan lagt rækt við ástríðu sína fyrir íslensku landslagi. Hann hefur starfað sem atvinnuljósmyndari síðustu fimm ár og hefur unun af að upplifa Ísland gegnum myndavélalinsuna og deila þeirri upplifun með öðrum gegnum magnaðar ljósmyndir af landi og þjóð. Myndir Gunnars hafa birst víða um heim og ein af þeim viðurkenningum sem hann hefur hlotið er að vera norrænn sendiherra Canon. Hægt er að skoða myndir hans á heimasíðunni www.icelandicexplorer.com

Sýningin stendur til 9. júlí og er opin alla daga kl. 10-18.

Hafðu samband

  • This email address is being protected from spambots. You need JavaScript enabled to view it.

Komdu í heimsókn

Fylgdu okkur